2025-nji ýylyň 23-nji aprelinde Türkmenistanyň bilen Gruziýanyň arasynda ikitaraplaýyn esasda döredilen parlamentara dostluk toparlarynyň duşuşygyna gatnaşmak üçin bu ýurduň paýtagty Tbilisi şäherine iş saparyny amala aşyrýan Türkmenistanyň Mejlisiniň wekiliýetiniň Gruziýanyň Parlamentiniň Başlygy Şalwa Papuaşwili bilen duşuşygy boldy.
Duşuşygyň barşynda iki ýurduň arasynda ýola goýlan ygtybarly gatnaşyklary parlament diplomatiýasynyň esasynda goldamak maksady bilen, Parlamentleriň arasynda guralýan ikitaraplaýyn saparlaryň möhüm ähmiýeti bellenildi.
Gruziýanyň Parlamentiniň Başlygy hemişelik Bitarap döwlet hökmünde Türkmenistanyň halkara giňişlikde öňe sürýän başlangyçlarynyň uly goldawa eýe bolýandygyny hem-de Türkmenistan bilen Gruziýanyň ikitaraplaýyn we köptaraplaýyn esasda ýola goýlan gatnaşyklary mundan beýläk-de kämilleşdirmäge uly gyzyklanma bildirýändigini nygtady.
Taraplar geljekde parlamentara hyzmatdaşlygyň ösdürilmegine ýardam berjek Parlamentara dostluk toparlarynyň işiniň kämilleşdirilmeginiň, ugurdaş komitetleriň, ýaş we zenan parlamentarileriň arasyndaky gatnaşyklaryň işjeňleşdirilmeginiň hem-de parlamentler derejesinde duşuşyklaryň we maslahatlaryň yzygiderli geçirilmeginiň ähmiýeti barada pikir alyşdylar.
