Eziz Watanymyzda ykdysadyýetiň ugurlarynyň sanlylaşdyrylmagyna, munuň üçin zerur bolan ýokary tizlikli internet torunyň üpjün edilmegine, häzirki zaman telekommunikasiýa ulgamynyň döredilmegine uly ähmiýet berilýär. Arkadagly Gahryman Serdarymyzyň baştutanlygynda täze tehnologiýalar, kämil hem akylly serişdeler pudaklara giňden ornaşdyrylýar. 2025-nji ýylyň 28-nji iýunynda Arkadag şäherinde Gahryman Arkadagymyzyň ak patasy bilen 5G internet ulgamynyň doly ornaşdyrylmagy ýurdumyzyň sanly eýýama ynamly gadam basýandygyny alamatlandyrdy.
Ýurdumyzyň sebitlerinde aragatnaşyk ulgamlaryny çekmek bilen bagly işler tapgyrlaýyn amala aşyryldy. Arkadag şäherinde 5G ulgamynyň işe girizilmegi bu tehnologiýanyň ýurdumyzyň ähli künjegine ýaýramagy üçin başlangyç ädim boldy. Dünýä ýüzünde soňky bäş ýylyň iň esasy tehnologik täzelikleriniň biri bolan bu aragatnaşyk ulgamy ähli ugurda işleriň has-da netijeli alnyp barylmagy üçin ýurdumyzda döwrebap iş ülňüleriniň, innowasion dolandyryş endikleriniň, ýokary hiliň we önümçilik kuwwatlylygynyň sazlaşygyny döretmegiň täze tapgyryna badalga berer. Ol gündelik durmuşymyzda adaty aragatnaşyk tehnologiýasy hökmünde peýdalanylyp, ykdysadyýetiň ýokary depginde ösmegine itergi berer.
Arkadagly Gahryman Serdarymyzyň belleýşi ýaly, ýaş nesil Watanymyzyň geljegidir, onuň okgunly ösüşiniň hereketlendiriji güýjüdir. Häzirki wagtda ýaşlar hormatly Prezidentimiziň badalga beren giň gerimli maksatnamalaryny, iri taslamalaryny durmuşa geçirmäge işjeň gatnaşýarlar. Arkadag şäherinde birnäçe ýokary okuw mekdepleriniň talyplarynyň ýaşaýyş jaýlarynyň ençemesinde «akylly» ulgamy goldamak işini amala aşyrandyklary munuň anyk mysallarynyň biridir. Mugallymlaryň hem-de talyplaryň gatnaşmagynda bilim ulgamy üçin sanly çözgütleriň işlenip taýýarlanylandygy bolsa, buýsandyryjy görkezijidir.
Hakmyrat BEKMYRADOW,
Türkmenistanyň Içeri işler ministrliginiň institutynyň mugallymy.
