Ýurdumyzda hereket edýän we ýokary derejeli hünärmenleri taýýarlaýan Seýitnazar Seýdi adyndaky Türkmen döwlet mugallymçylyk institutynyň täze binalar toplumlanyň gurluşygy häzirki wagtda gyzgalaňly derejede alnyp barylýar. Bu täze binalar toplumynyň açylmagy diňe bir bilim ulgamyndaky gurluşyk däl, eýsem türkmen biliminiň geljegine goýulýan iň uly maýadyr. «Garaşsyz, baky Bitarap Türkmenistan — bedew batly at-myradyň mekany» ýylynyň Bilimler we talyp ýaşlar gününde institutymyzyň täze binalar toplumynyň dabaraly açylmagy möhüm waka bolar.
Täze okuw şäherçesi iň döwrebap tehnologiýalar we sanly ulgamlar bilen doly enjamlaşdyrylar. Bu ýerde talyp ýaşlar üçin ähli şertler — giň we ýagty okuw otaglary, iň soňky nusgadaky kompýuter tehnikalary bilen üpjün edilen laboratoriýalar, baý kitap goruna eýe bolan sanly kitaphanalar we sport toplumlary dörediler. Institutyň täze binasynyň binagärlik keşbi milli ýörelgeler bilen häzirki zaman dizaýnynyň utgaşmasy bolup, ol Lebap welaýatynyň Türkmenabat şäheriniň iň gözel künjekleriniň birine öwrüler.
Mugallymçylyk institutynyň täze binalar toplumynyň açylmagy, geljekki mugallymlaryň hünär taýýarlygyna bolan talabyň artýan döwründe örän uly ähmiýete eýedir. Sanly bilimiň we innowasion usullaryň giňden ornaşdyrylmagy talyp talyplaryň diňe bir nazary bilimleri däl, eýsem amaly başarnyklary hem kämil derejede özleşdirmegine mümkinçilik berer. Bu ýerde bilim aljak ýaşlar özleriniň pedagogik ukyplaryny interaktiw usullar arkaly kämilleşdirip, mekdeplere baranlarynda iň döwrebap bilim beriş tehnologiýalaryny ulanmaga taýýar bolar durlar.
Jemläp aýtsak, 1-nji sentýabrda gapylaryny giňden açjak bu täze ylym ojagy ýurdumyzyň bilim ulgamynyň kuwwatyny has-da artdyrar. Türkmenistanyň geljegini gurjak nesilleri terbiýeleýän mugallymlaryň şeýle täzeçil şertlerde bilim almagy, «Bilim — bagtyň we ösüşiň gözbaşydyr» diýen pelsepäniň durmuşdaky dabaralanmasydyr. Täze binalar toplumy bilim ýolunda ýene bir nurly şamçyrag bolar.
Mahym DÖWLETMYRADOWA,
Seýitnazar Seýdi adyndaky Türkmen döwlet mugallymçylyk institutynyň pedagogika fakultetiniň başlangyç bilim mugallymçylygy we psihologiýasy hünäriniň 105-nji toparynyň talyby.
