Gahryman Arkadagymyzyň Amerikanyň Birleşen Ştatlaryna amala aşyran taryhy sapary we onuň çäklerinde dünýä belli «Al-Arabiýa» teleýaýlymyna beren interwýusy halkara jemgyýetçiliginiň ünsüni Türkmenistanyň barha artýan abraýyna gönükdirdi. Bu söhbetdeşlik diňe bir diplomatik gatnaşyklary däl, eýsem, Türkmenistanyň dünýäniň ykdysady we syýasy giňişligindäki strategik ornuny hem aýdyň görkezdi. Milli Liderimiziň millionlarça tomaşaçysy bolan halkara teleýaýlymyň alypbaryjysynyň sowallaryna beren çuňňur manyly we anyk jogaplary döwletimiziň parahatçylyk söýüjilikli syýasatynyň nobatdaky dabaralanmasyna öwrüldi.
Interwýunyň dowamynda Gahryman Arkadagymyz türkmen-amerikan hyzmatdaşlygynyň häzirki ýagdaýyna we geljegine uly orun berdi. Iki ýurduň arasyndaky gatnaşyklaryň özara hormat goýmak we deňhukuklylyk esasynda guralýandygyny belläp, bu hyzmatdaşlygyň diňe bir ikitaraplaýyn bähbitlere däl, eýsem, sebit durnuklylygyna hem hyzmat edýändigini nygtady. Esasanam, ýokary tehnologiýalar, energetika we bilim ulgamlarynda hyzmatdaşlygyň täze mümkinçilikleri baradaky pikirler halkara bilermenleriň arasynda uly gyzyklanma döretdi.
Milli Liderimiz Türkmenistanyň ykdysady kuwwaty barada durup geçmek bilen, ýurdumyzyň uly energetika serişdelerine we amatly geografik ýerleşişine ünsi çekdi. Energetika diplomatiýasy, energiýa serişdelerini dünýä bazarlaryna diwersifikasiýa ýoly bilen çykarmak strategiýasy boýunça halkara geçelgeleriň ähmiýeti barada giňişleýin durlup geçildi. Şeýle-de daşary ýurtly hyzmatdaşlar üçin ýurdumyzda döredilýän amatly hukuk we ykdysady şertler interwýunyň esasy özeni boldy.
Bu taryhy interwýu bütin dünýäde gyzgyn seslenme tapdy. «Al-Arabiýa» ýaly iri habar beriş serişdeleriniň üsti bilen Türkmenistanyň parahatçylyk söýüjilikli, Bitaraplyk ýörelgelerine esaslanýan daşary syýasat ugrunyň mazmuny giň auditoriýa ýetirildi. Bilermenleriň pikirine görä, Gahryman Arkadagymyzyň ABŞ-nyň we dünýäniň işewür toparlaryna beren anyk jogaplary Türkmenistanyň halkara abraýynyň täze belentliklere galýandygynyň subutnamasydyr.
Muhammetmurat NARMEDOW,
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 5-nji ýyl talyby.
