“Arkadag” — “Al-Nassr” duşuşygyna millionlarça janköýer tomaşa eder. Maglumatlara görä, duşuşyk dünýäniň 170-e golaý ýurdunda göni ýaýlymda alnyp görkeziler. Munuň üçin stadionyň dürli ýerlerinde ýokary hilli ýazgy edýän kameralaryň 14-si gurnaldy.
Ýaýlyma beriş işine ussat hünärmenleriň 220-den gowragy gatnaşar. Bu alnyp görkezilişe çawy dünýä ýaýran mediakompaniýalaryň 40-a golaýy gatnaşýar. 13 döwletden 25 töweregi žurnalist bolsa AFK-nyň II Çempionlar ligasynyň 1/8 finalyndaky iň ünsi çekýän duşuşyga stadionda tomaşa etmek üçin paýtagtymyza geldi. Duşuşyk olar üçin hem ajaýyp Aşgabada gezelenje öwrüldi. Daşary ýurtly kärdeşlerimiz üçin paýtagtymyzyň gözel ýerlerine we muzeýlerine gezelençler guraldy.
Žurnalistler düýn stadionyň metbugat merkezinde “Arkadag” we “Al-Nassr” futbol toparlarynyň baş tälimçileridir futbolçylarynyň gatnaşmagynda geçirilen metbugat maslahatynda özlerini gyzyklandyrýan sowallara jogap aldylar.
«THE ASHGABAT TIMES».
