25-nji fewral 2026-njy ýyl, London. Beýik Britaniýanyň Korollyk Atly gwardiýasynyň bazasynda Merkezi Aziýa ýurtlarynyň daşary işler ministrleriniň Beýik Britaniýanyň Döwlet goranmak ministri Lord Rodni Koukker bilen duşuşygy geçirildi. Oňa Türkmenistanyň Daşary işler ministri Raşid Meredow hem gatnaşdy.
Duşuşyk dowamynda sebit howpsuzlygy, özara düşünişmegiň pugtalandyrylmagy hem-de Merkezi Aziýa döwletleri bilen Birleşen Patyşalyk arasynda dialogyň ösdürilmegi boýunça meseleler ara alnyp maslahatlaşyldy.
Taraplar hünärmenleri taýýarlamak, häzirki zaman howplaryna we wehimlerine jogap bermek boýunça mehanizmleri kämilleşdirmek babatda tejribe alyşmagyň ähmiýetini aýratyn nygtadylar.
Çäräniň gatnaşyjylary sebitleýin hem-de halkara derejesinde durnuklylygy we howpsuzlygy berkitmäge gönükdirilen konstruktiw we ynanyşmaga esaslanýan hyzmatdaşlygyň dowam etdirilmeginiň möhümdigini bellediler.
