2026-njy ýylyň 13-nji fewralynda Türkmenistanyň Özbegistan Respublikasyndaky Ilçihanasynyň binasynda «Garaşsyz, baky Bitarap Türkmenistan — bedew batly at-myradyň mekany» diýlip yglan edilen 2026-njy ýylyň şygaryna bagyşlanan çäre hem-de Türkmenistanyň Prezidentiniň «Türkmenistanyň Bitaraplygy — parahatçylygyň we ynanyşmagyň aýdyň ýoly» atly kitabynyň tanyşdyrylyş dabarasy boldy.
Çärä Özbegistan Respublikasynyň Oliý Majlisiniň Kanunçylyk palatasynyň deputaty, Respublikan türkmen medeni merkeziniň başlygy, türkmen diasporasynyň wekilleri, Özbegistanyň ýokary okuw mekdeplerinde okaýan türkmen talyplary, şeýle hem Ilçihananyň işgärleri gatnaşdylar.
Türkmenistanyň Özbegistan Respublikasyndaky Ilçisi Ş.Meredow öz çykyşynda 2026-njy ýylyň şygarynyň 2025-nji ýylyň — «Halkara parahatçylyk we ynanyşmak ýylynyň» ideýalarynyň logiki dowamydygyny aýratyn nygtady. Şeýle hem häzirki şygaryň simwolikasynyň türkmen halkynyň ruhy we medeni gymmatlyklaryna ygrarlylygy hem-de häzirki zaman dünýä ýagdaýlary bilen baglydygy bellenildi. Türkmenistanyň 2028-nji ýyly «Halkara hukuk ýyly» diýip ylan etmek baradaky başlangyjynyň ähmiýeti, ýurduň halkara hukuk kadalaryna ygrarlydygy bellenilip geçildi.
Nygtalyşy ýaly, hormatly Prezidentimiziň täze kitabynda Bitaraplygyň hukuk we syýasy esaslary, onuň sebit we dünýä durnuklylygyndaky orny, şeýle hem Türkmenistanyň parahatçylyk medeniýetini ösdürmäge goşýan goşandy giňişleýin beýan edilýär.
Dabaranyň ahyrynda oňa gatnaşyjylara türkmen milli tagamlary hödür-kerem edildi.
«THE ASHGABAT TIMES».
