Mälim bolşy ýaly, her ýylyň 18-nji fewraly Türkmenistanyň diplomatik işgärleriniň güni hökmünde ýurdumyzda giňden bellenilip geçilýär. Milli senenamamyzdan görnükli orun alan bu şanly sene türkmen diplomatlaryna we olaryň alyp barýan asylly işlerine döwlet derejesinde goýulýan sarpanyň nyşanydyr. Türkmen diplomatiýasynyň dostluk, hoşniýetli goňşuçylyk gatnaşyklary, sebit hem-de halkara gatnaşyklarynda özara düşünişmek we ynanyşmagy pugtalandyrmaga gönükdirilen başlangyçlary dünýä derejesinde uly ähmiýete eýedir.
Berkarar döwletiň täze eýýamynyň Galkynyşy döwründe Türkmenistan dünýä arenasynda parahatçylygyň, durnuklylygyň we dostlukly gatnaşyklaryň hakyky nusgasyna öwrüldi. Gahryman Arkadagymyzyň başyny başlan we Arkadagly Gahryman Serdarymyzyň yzygiderli ösdürýän parahatçylyk söýüjilikli daşary syýasat strategiýasy bu gün halkara giňişlikde belent dabaralanýar. Türkmen diplomatiýasynyň dostluk, hoşniýetli goňşuçylyk gatnaşyklary, sebit hem-de halkara gatnaşyklarynda özara düşünişmek we ynanyşmagy pugtalandyrmaga gönükdirilen başlangyçlary dünýä derejesinde uly ähmiýete eýedir. Döwletimiziň daşary syýasatynyň üstünlikli amala aşyrylmagynda diplomatik gullugyň üstüne örän jogapkärli wezipeler düşýär.
Hormatly Prezidentimiz milli bähbitlerimizi goramakda we dünýä ýurtlary bilen özara bähbitli hyzmatdaşlygy ösdürmekde anyk wezipeleri kesgitlemek bilen, diplomatik gullugyň maddy-enjamlaýyn binýadyny we diplomatlaryň hünär derejesini kämilleşdirmegi hemişe üns merkezinde saklaýar. Ýurdumyzyň bu ugurdaky uly ýeňişleriniň we belent sepgitleriniň binýadynda bolsa, diplomatik işgärleriň täze neslini kemala getirýän Türkmenistanyň Daşary işler ministrliginiň Halkara gatnaşyklary instituty aýratyn orun eýeleýär. Bu ýokary okuw mekdebinde diňe bir nazary bilimler berilmän, eýsem, zamananyň innowasion tehnologiýalaryndan oňat baş çykarýan, dünýä ösüşleri bilen aýakdaş gidýän täze nesliň wekilleri taýýarlanýar. Olaryň her biri geljekde milli diplomatik gullugymyzyň binýadyny berkidip, ýurdumyzyň halkara abraýyny has-da dabaralandyrmaga ugrukdyrylýar.
Garaşsyz, baky Bitarap döwletimiziň açyklygy, ygtybarly döwlet hökmünde giň möçberli hyzmatdaşlyga taýýarlygy hem-de ählumumy meseleleriň oňyn çözgüdini tapmak ugrundaky işjeňligi halkara durmuşynda türkmen diplomatiýasynyň ykrar edilmegine itergi berýär. Ösüş arkaly parahatçylyga hyzmat edýän bu wezipeler, ilkinji nobatda, baky Bitaraplygymyzyň ynsanperwer ýörelgeleri bilen sazlaşýar. Türkmen diplomatiýasyny ýeňişli menzillerde öňe alyp barýan Gahryman Arkadagymyzyň hem-de hormatly Prezidentimiziň janlarynyň sag, ömürleriniň uzak bolmagyny tüýs ýürekden arzuw edýäris.
Aýna SÄTGELDIÝEWA,
Türkmenistanyň Daşary işler ministrliginiň Halkara gatnaşyklary institutynyň Dünýä dilleri kafedrasynyň uly mugallymy.
