Ýakynda Birleşen Arap Emirlikleriniň Dubaý şäherinde «International World Innovative Student Exhibition (iWISE)» halkara platformasynyň «Oscar Education» atly daşary ýurtlarda bilim almak boýunça maslahat beriji kompaniýasynyň guramagynda robototehnika boýunça halkara olimpiada geçirildi. Dünýäniň dürli ýurtlaryndan 400-den gowrak okuwçyny bir ýere jemlän bu abraýly halkara olimpiada ýurdumyzyň Aşgabat we Arkadag şäherleriniň zehinli mekdep okuwçylaryndan jemi 5 topar robototehnikanyň ugurlary boýunça gatnaşyp, ýokary netijeleri gazanmagy başardy.
Dünýäniň 10 — 24 ýaş aralygyndaky iň güýçli ýaş oýlap tapyjylary halkara olimpiadada «Robot maze» (Robotlaryň labirintden geçmegi), «Line follower» (Çyzygy yzarlaýan robotlar), «Mini sumo» (Robotlaryň göreşi) ugurlary boýunça bäsleşdiler.
Halkara bäsleşige ýurdumyzdan gatnaşan okuwçylara Aşgabat şäherindäki 97-nji orta mekdebiň mugallymy Halil Kowusow we Arkadag şäheriniň 1-nji ýöriteleşdirilen okuw-terbiýeçilik toplumynyň mugallymy Myrat Sähetgulyýew ýolbaşçylyk etdiler. Ýurdumyzyň zehinli mekdep okuwçylary bu abraýly olimpiadada 2 altyn, 6 kümüş hem-de 4 sany bürünç medala eýe boldular.
«THE ASHGABAT TIMES».
