Ministrler Kabinetiniň 13-nji fewralda geçirilen giňişleýin mejlisinde geçen ýylda ýurdumyzda alnyp barlan işleriň jemleri jemlenilip, Watanymyzy durmuş-ykdysady taýdan ösdürmek boýunça şu ýylda öňde durýan wezipeler ara alnyp maslahatlaşyldy. Mejlisiň dowamynda halkymyzyň bagtyýarlygyny we abadan durmuşyny üpjün etmäge gönükdirilen döwlet ähmiýetli çözgütler kabul edildi. Şolaryň hatarynda hormatly Prezidentimiziň «Türkmenistany 2026-njy ýylda durmuş-ykdysady taýdan ösdürmegiň we maýa goýum Maksatnamasyny» tassyklamak boýunça Karara gol çekmegi eziz Diýarymyzda durnukly ykdysady ösüşi üpjün etmek babatda ýadawsyz tagallalaryň edilýändigini görkezýär.
Täze maksatnama «Garaşsyz, baky Bitarap Türkmenistan — bedew batly at-myradyň mekany» ýylynda milli ykdysadyýetimiziň, ýurdumyzyň sebitleriniň durnukly ösüşini üpjün etmegi, senagat-innowasion ösüş derejesini ýokarlandyrmagy, ykdysadyýeti sanlylaşdyrmagy dowam etdirmegi, maýa goýumlaryň işjeňligini artdyrmagy, işewürlik gurşawyny ösdürmegi hem-de hususy pudagyň ugurlaryny we gerimini giňeltmegi, täze iş orunlaryny döretmegi, ilatyň ýaşaýyş-durmuş derejesini mundan beýläk-de ýokarlandyrmagy nazarlaýar.
Ykdysadyýetiň ähli pudaklarynyň sazlaşykly ösüşini üpjün etmek maksady bilen, şu ýylda jemi içerki önümiň ösüş depginini 6,3 göterim derejesinde saklamak meýilleşdirilýär. Şeýle hem ýurdumyzyň ykdysadyýetine maliýeleşdirmegiň ähli çeşmeleriniň hasabyna jemi 41,2 milliard manada golaý maýa goýumlary gönükdirmek, täze kärhanalaryň gurlup ulanmaga berilmegi bilen ýurt boýunça 5 müň 300-e golaý täze iş orunlaryny döretmek maksat edinilýär. Diňe halkymyzyň bähbidine, Watanymyzyň dünýädäki abraýynyň barha belende galmagyna gönükdirilen bu asylly maksatlara ýetmekde, döwletli başlangyçlary amala aşyrmakda hususy pudagyň orny örän uludyr.
Bir söz bilen aýdanyňda, «Türkmenistany 2026-njy ýylda durmuş-ykdysady taýdan ösdürmegiň we maýa goýum Maksatnamasy» «Döwlet adam üçindir!», «Watan diňe halky bilen Watandyr! Döwlet diňe halky bilen döwletdir!» diýen baş şygarlaryň has-da dabaralanýandygyny alamatlandyryp, onuň esasynda «Garaşsyz, baky Bitarap Türkmenistan — bedew batly at-myradyň mekany» ýylynda amala aşyryljak giň gerimli özgertmeler, tutumly başlangyçlar halkymyzyň ýaşaýyş-durmuş derejesini hil taýdan täze basgançaga göterer.
Adalat ŞAMURZAÝEWA,
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 3-nji ýyl talyby.
