Germaniýanyň Federal Prezidenti Frank-Walter Ştaýnmaýer häzirki geopolitiki ýagdaýda ygtybarly hyzmatdaşlar hökmünde Gazagystan, Gyrgyzystan, Täjigistan, Türkmenistan we Özbegistanyň daşary işler ministrlerini resmi kabul etdi. Germaniýa bilen Merkezi Aziýanyň bäş döwleti arasyndaky strategik hyzmatdaşlygyň pugtalandyrylmagy iki tarap üçin hem möhüm ugur hökmünde görkezildi.
Duşuşykda ilkinji nobatda ykdysady hyzmatdaşlygy giňeltmek, aýratyn-da çig mal, energetika we senagat pudaklaryndaky hyzmatdaşlygy güýçlendirmek, şeýle hem Ýewropa bilen Merkezi Aziýanyň arasyndaky ulag-logistika geçelgelerini ösdürmek meseleleri ara alnyp maslahatlaşyldy. Taraplar energiýa howpsuzlygy, üstaşyr mümkinçilikleri we täze ulag ugurlarynyň döredilmegi boýunça pikir alyşdylar.
Howpsuzlyk meseleleri hem gün tertibiniň möhüm bölegi boldy. Hususan-da, Owganystandaky ýagdaý, sebitleýin durnuklylygyň üpjün edilmegi, serhet howpsuzlygy boýunça hyzmatdaşlygyň zerurlygy we sebitde parahatçylygy saklamak boýunça bilelikdäki tagallalar ara alnyp maslahatlaşyldy. Şeýle hem suw serişdelerini dolandyrmak babatda sebit hyzmatdaşlygynyň ähmiýeti aýratyn nygtaldy.
Duşuşyk Berlinde geçirilen “Merkezi Aziýa 5+1” halkara maslahatynyň çäginde guraldy. Bu format Germaniýanyň sebit bilen strategik dialogy çuňlaşdyrmak, hyzmatdaşlygy giňeltmek we geljekde geçiriljek döwlet we hökümet baştutanlarynyň ýokary derejeli sammitine taýýarlyk görmek maksadyna hyzmat edýär.
Bu duşuşyk Merkezi Aziýa bilen Ýewropa Bileleşiginiň arasynda ykdysady, syýasy we howpsuzlyk ugurlary boýunça hyzmatdaşlygyň täze tapgyra gadam basýandygyny görkezýär.
