Mekdep durmuşynda her bir dersiň öz orny bar, ýöne himiýa — bu diňe bir elementleriň simwollary däl-de, eýsem, bizi gurşap alýan dünýäniň içki gurluşyny we syrlaryny öwredýän ylymdyr. Mugallym hökmünde meniň esasy maksadym, okuwçylara bu dersiň diňe bir çylşyrymly formulalar däl, eýsem durmuşyň özi hakyndadygyny görkezmekdir.
Himiýa dersi mekdepde nazary we amaly bilimleriň utgaşmasynda okadylýar. Häzirki zaman bilim ulgamynda biz diňe kitap bilen çäklenmän, eýsem, laboratoriýa işlerine, tejribeler arkaly madda we reaksiýalary göz bilen görmäge, şeýle hem sanly tehnologiýalara, maddalaryň molekulýar gurluşyny interaktiw tagtalarda we 3D modellerde öwrenmäge üns berýäris.
Himiýany öwrenmek okuwçyda diňe bir bilim däl, eýsem, birnäçe möhüm başarnyklary, aýratyn hem, logiki pikirlenme, ekologik medeniýet, hünär saýlamak ýaly başarnyklary kemala getirýär. Meselem,reaksiýalaryň deňlemelerini düzmek we hasaplamalar geçirmek okuwçynyň analitiki ukybyny ösdürýär. Tebigaty goramagyň, himiki serişdeleri dogry ulanmagyň we daşky gurşawa aýawly çemeleşmegiň esaslaryny öwredýär.
Türkmenistan — tebigy serişdelere baý döwlet. Şol sebäpli hem himiýa senagaty ykdysadyýetimiziň esasy ugry bolup hyzmat edýär. Berkarar döwletiň täze eýýamynyň Galkynyşy döwründe bu ulgamda uly ösüşler gazanylýar. Dökün önümçiliginde «Marykarbamid», «Garabogazkarbamid» ýaly iri zawodlar ýurdumyzyň oba hojalygyny kuwwatlandyrýar we önümlerini dünýä bazaryna çykarýar. Polimer senagatynda hem Gyýanlydaky polimer zawody nebit-gaz çig malyndan dünýä standartlaryna laýyk gelýän polietilen we polipropilen öndürýär. Ýangyç we himiýa babatda bolsa Ahal welaýatyndaky tebigy gazdan ekologik taýdan arassa benzin öndürýän zawod dünýäde ýeke-täk tehnologiýalaryň biridir.
Görnüşi ýaly, himiýany öwrenmek — bu geljegi öwrenmekdir. Biz mekdepde ýaşlara döwrebap bilim bermek bilen, olary ýurdumyzyň senagat kuwwatyny has-da ýokary göterjek hünärmenler edip ýetişdirmegi maksat edinýäris. Her bir laborator barlagy, her bir öwrenilen element eziz Watanymyzyň ösüşlerine goşuljak goşantdyr.
Şarapat HATAMOWA,
Çärjew etrabynyň 20-nji orta mekdebiniň himiýa mugallymy.
