Kitap — adamzadyň köňül çyragy, gözýetimiňi giňeltmäge ýol açýan çelgi, bagtyýarlyga beslenen täze dünýäniň altyn açarydyr. Hut şonuň üçinem kitaplara, pähim-paýhas ojagy bolan kitaphanalara halkymyz ir döwürlerden bäri aýratyn hormat goýup gelýär. «Kitap okamaýan görýänini görer, kitap okaýan dünýäni görer» diýlişi ýaly, ynsan okamak, öwrenmek bilen kämilleşýär, täze dünýäniň gapysyny açýar. Şol dünýä bolsa saňa edep-terbiýelilik, bagtyýarlyk, tutanýerlilik eçilip, maksat-myratlaryňa ýetirýär.
Türkmen halky kitaphon halk. Kitaphonlyk — asyrlaryň jümmüşinden geçip, biziň günlerimize gelip ýeten, bize ata-babalarymyzdan miras galan ýagşy häsiýetdir. Muňa mysal hökmünde, Nurmyrat Saryhanowyň «Kitap» hekaýasyny hem görkezmek bolar. Her bir adamyň hem kitap bilen dostlaşmagy esasynda öz durmuşyna özboluşly öwüşgin çaýýanlygy ikuçsuzdyr.
Gahryman Arkadagymyzyň «Ömrümiň manysynyň dowamaty» atly ylmy-filosofik eserinde diňe kitaby köp okaýan halklaryň dünýä nusgalyk medeniýeti döredip bilýändigi aýdylýar. Bu bolsa kitabyň ylym-bilimi, medeniýeti ösdürmekde ähmiýetiniň näderejede uludygyndan habar berýär. Çünki kitap kämillige eltýän ýoldur, röwşen geljege, bagtyýar ýaşaýşa ýetirýän bahasyz hazynadyr. Munuň şeýledigine anyk göz ýetiren merdana halkymyz gadymy döwürlerden bäri birnäçe kitaphanalary gurup, olarda dünýä belli alymlaryň kitaplarynyň bolmagyna şert döredipdir.
Ýeri gelende, Milli Liderimiziň hem-de hormatly Prezidentimiziň nusgalyk kitaplarynyň biziň her birimiz üçin gymmatly çeşmedigini nygtamalydyrys. Olar ýaş nesilleri watançylyk, parahatsöýüjilik, ynsanperwerlik ruhunda terbiýelemekde uly orna mynasypdyr. Sebäbi Milli Liderimiziň hem-de döwlet Baştutanymyzyň nusgalyk kitaplarynda şöhratly taryhymyz, türkmençilik ýörelgelerimiz ör-boýuna galýar. Olarda berilýän gyzykly maglumatlar bolsa her bir okyjyny täsin dünýä alyp gidýär, dünýägaraýşyny giňeldýär. Çünki kitap okamak ylym-bilimden doly dünýä syýahat etmekdir.
Döwletgeldi ANNAÝEW,
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 3-nji ýyl talyby.
