Berkarar döwletiň täze eýýamynyň Galkynyşy döwründe üstünlikli amala aşyrylýan il-ýurt bähbitli, dünýä ähmiýetli beýik işleriň netijesinde Garaşsyz, hemişelik Bitarap Türkmenistan döwletimiz dünýäniň iň bir ösen, kuwwatly döwletleriniň birine öwrüldi. Şonuň üçin hem berkarar Watanymyzyň buýsançly ýaşlary ata-babalarymyzyň asyrlarboýy arzuw eden mukaddes Garaşsyzlygyny, baky Bitaraplygyny has-da pugtalandyrmakda, döwletimiziň abraý-mertebesini mundan beýläk-de belende götermekde özlerine aýratyn ornuň degişlidigine çuňňur düşünýärler.
Türkmen halkynyň Milli Lideri Gahryman Arkadagymyzyň başyny başlan taryhy özgertmelerini üstünlikli dowam etdirýän hormatly Prezidentimiziň parasatly ýolbaşçylygynda ýaşlaryň dünýä derejesinde ylym-bilim almagyna, ata Watanymyzy ösüşiň täze belentliklerine alyp gitjek kämil hünärmenler bolup ýetişmegine giň ýol açyldy, olaryň ruhy-ahlak taýdan kämilleşmegi, beden taýdan ösmegi, döwrebap bilim almagy hem-de jemgyýetçilik durmuşyna işjeň gatnaşmagy üçin ähli mümkinçilikler döredildi.
Dünýä ülňülerine laýyk gelýän multimedia enjamly orta, ýörite we ýokary okuw mekdepleri ösüp gelýän ýaş nesliň ylym-bilimi has-da çuňňur ele almagyny üpjün edýär. Ýurdumyzda hem halkara derejesindäki ýokary okuw mekdepler yzygiderli açylyp, talyplyga kabul edilýänleriň sany ýyl-ýyldan artýar. Bilim bermegiň hilini dünýä ülňülerine laýyk getirmek, okatmagyň usulyýetini kämilleşdirmek, bu ugurda innowasion usullary okuw işine giňden ornaşdyrmak boýunça giň gerimli işler amala aşyrylýar.
Ýaşlaryň beden taýdan sagdyn bolup ýetişmegi üçin Diýarymyzyň ähli künjeklerinde stadionlar, bedenterbiýe-sagaldyş toplumlary, beýleki sport desgalary hereket edýär. Häzirki wagtda ýurdumyzda sagdyn durmuş ýörelgelerini wagyz etmäge gönükdirilen çäreler giň gerime eýe bolmak bilen, özüniň oňyn netijesini berýär.
Yhlas ARTYKOW
Ýagşygeldi Kakaýew adyndaky
Halkara nebit we gaz uniwersitetiniň talyby
