Häzirki wagtda BMG-niň Bilim, ylym we medeniýet meseleleri boýunça guramasy (ÝUNESKO) bilen hyzmatdaşlygy ösdürmek ýurdumyzyň daşary syýasat strategiýasynda ileri tutulýan ugurlaryň biri hökmünde kesgitlenilendir. Şoňa görä-de, 21-nji fewralda hormatly Prezidentimiziň tabşyrygy boýunça Daşary işler ministrliginde ÝUNESKO-nyň işleri barada Türkmenistanyň milli toparynyň nobatdaky mejlisiniň geçirilmegi möhüm ähmiýete eýedir.
Mälim bolşy ýaly, Türkmenistan döwletimiz 1993-nji ýyldan bäri BMG-niň bu ýöriteleşdirilen düzüminiň doly hukukly agzasydyr. Şunuň bilen baglylykda, mejlisiň dowamynda bu ugurdaky hyzmatdaşlygy ösdürmegiň meselelerine garaldy, halkymyzyň milli gymmatlyklaryny ÝUNESKO-nyň Adamzadyň maddy däl medeni mirasynyň sanawyna girizmek boýunça teklipler bilen baglylykda, özara gatnaşyklaryň geljekki ugurlary kesgitlenildi. Mundan başga-da, döwlet Baştutanymyzyň tabşyrygyna laýyklykda milli toparyň geçen ýylda alyp baran işleriniň jemleri, 2026-njy ýylyň meýilnamasynda bellenilen wezipeler baradaky maglumatlar diňlenildi.
Bellenilişi ýaly, 2025-nji ýylda ÝUNESKO-nyň hem-de onuň sebit düzümleriniň wekilleri bilen sanly ulgam arkaly duşuşyklaryň, geňeşmeleriň onlarçasy geçirildi. Şunda ýurdumyzyň ylym we bilim ulgamyny ösdürmekde gazanan ýokary netijeleri nazara alnyp, Aşgabat şäheriniň ÝUNESKO-nyň öwreniji şäherleriniň bütindünýä toruna girizilmegi möhüm waka boldy. Mejlisde çykyş edenler geçen ýylyň dekabrynda Hindistan Respublikasynyň Nýu-Deli şäherinde geçirilen ÝUNESKO-nyň Maddy däl medeni mirasy goramak boýunça hökümetara komitetiniň 20-nji mejlisinde türkmen alabaý itlerini ösdürip ýetişdirmek däpleriniň ÝUNESKO-nyň Adamzadyň maddy däl medeni mirasynyň sanawyna girizilendigine aýratyn ünsi çekdiler.
Umuman, BMG-niň Bilim, ylym we medeniýet meseleleri boýunça guramasynyň (ÝUNESKO) işleri barada Türkmenistanyň milli toparynyň nobatdaky mejlisinde garalan meseleler ýurdumyzda medeni diplomatiýany ilerletmek, şol sanda halkara medeni hyzmatdaşlygy ösdürmek babatda netijeli işleriň üstünlikli durmuşa geçirilýändiginiň güwäsine öwrüldi.
Gülnäzik AGAÝEWA,
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 3-nji ýyl talyby.
