Saglygy goraýyş diplomatiýasy diňe bir tagallalary birleşdirmek arkaly bütin adamzadyň sagdyn ýaşaýyş gurşawyny emele getirmegi göz öňünde tutman, eýsem, häzirki zaman dünýäsinde parahatçylygy we ynanyşmagy döretmegiň hem möhüm köprüleriniň biridir. Şoňa görä-de, ýakynda paýtagtymyzda «Bütindünýä saglygy goraýyş çygrynda diplomatiýa boýunça ýokary derejeli dialog» atly halkara okuw maslahatynyň geçirilmegi möhüm ähmiýete eýedir. Bu giň möçberli forumyň guralmagy ýurdumyzyň oňyn Bitaraplyk, ynsanperwerlik ýörelgelerine esaslanýan döredijilikli daşary syýasatynyň dabaralanýandygynyň nobatdaky aýdyň güwäsi boldy.
Şeýle ähmiýetli çäräniň Aziýanyň merjeni diýlip ykrar edilen paýtagtymyz Aşgabatda geçirilmegi ýurdumyzyň dünýä giňişliginde ynsanperwer ýörelgeleri ilerletmek boýunça işjeň ornunyň ykrarnamasydyr. Türkmenistanyň Hökümeti bilen Bütindünýä Saglygy Goraýyş Guramasynyň bilelikde guran forumyna iri halkara düzümleriň ýolbaşçylary, görnükli diplomatlar, sebitiň ýurtlarynyň Saglygy goraýyş ministrlikleriniň wekilleri, abraýly bilermenler gatnaşdylar.
Okuw maslahaty häzirki döwrüň derwaýys meselelerini çözmekde halkara jemgyýetçiligiň tagallalaryny birleşdirmek üçin netijeli platformany döretmäge gönükdirildi. Çünki häzirki döwrüň lukmançylyk ulgamynda ählumumy meseleleri çözmek üçin täze çemeleşmeler zerur bolup durýar. Bu günki günde saglygy goraýyş diňe bir hünär ulgamy däl-de, eýsem, daşary syýasatyň hem möhüm şerti bolup çykyş edýär. Şu nukdaýnazardan, ählumumy derejede üýtgeşmeleriň bolup geçýän döwründe Türkmenistanyň lukmançylyk diplomatiýasyny ösdürmek boýunça başlangyçlary parahatçylygy we durnukly ösüşi üpjün etmekde aýgytlaýjy orny eýeleýär.
Jemläp aýdanyňda, tutuş adamzadyň bähbidine halkara hyzmatdaşlygyň hil taýdan täze mehanizmlerini işläp taýýarlamagy maksat edinen halkara okuw maslahaty Aşgabadyň sebitiň intellektual merkezi hökmünde eýeleýän ornuny ynamly pugtalandyrýandygyny görkezdi.
Uzykjemal ARTYKOWA,
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 3-nji ýyl talyby.
