Taryhy gymmatlyklar — bu diňe bir geçmişden galan ýadygärlikler däl, eýsem adamzadyň medeniýetiniň, ylmy ösüşiniň we ruhy mirasynyň möhüm bölegidir. Dünýäniň dürli ýurtlarynda bu mirasy gorap saklamak, geljekki nesillere ýetirmek we asyl keşbini dikeltmek häzirki wagtda möhüm wezipeleriň biri hökmünde öňe çykýar.
Şu nukdaýnazardan, Ankara we Stambul şäherlerinde geçirilýän «Dikeldiş we gorap saklaýyş barlaghanalary üçin Türkiýe tejribe alyşma maksatnamasy» halkara derejesinde uly üns çekýär. Maksatnama 11-nji fewralda Stambulyň Merkezi we Sebitleýin Restawrasiýa hem-de Konserwasiýa Müdirýetinde «Dikeldiş we gorap saklamak tejribeleri» mowzugy boýunça dowam etdirildi.
Maslahata gatnaşan professorlar we hünärmenler taryhy binagärlik ýadygärliklerini öwrenmek, barlag geçirmek, olaryň gurluş aýratynlyklaryny seljermek hem-de rejeleýiş işleriniň häzirki zaman usullary barada çykyş etdiler. Şeýle hem türki dünýäsiniň maddy we ruhy mirasyny gorap saklamak, ony dünýäde wagyz etmek we ylmy taýdan öwrenmek boýunça giňişleýin pikir alyşmalar geçirildi.
Çäräniň dowamynda gatnaşyjylar dürli ýurtlaryň tejribelerini deňeşdirip, restawrasiýa we konserwasiýa ulgamynda täze tehnologiýalaryň orny, sanly barlag usullary, şeýle hem halkara hyzmatdaşlygynyň ähmiýeti barada sorag-jogap alyşdylar.
Bu halkara maksatnama taryhy mirasy gorap saklamak boýunça sebitdäki hyzmatdaşlygy güýçlendirmäge, täze ylmy çemeleşmeleri ornaşdyrmaga we medeni gymmatlyklaryň geljek nesillere asyl görnüşinde ýetirilmegine hyzmat edýär.
