Hormatly Prezidentimiziň parasatly baştutanlygynda medeniýet ulgamy döwlet syýasatynyň ileri tutulýan ugurlarynyň birine öwrüldi. Bu gün türkmen medeniýeti we sungaty parahatçylygyň, dost-doganlygyň hem-de medeni diplomatiýanyň iň täsirli guraly hökmünde dabaralanýar. Ýakynda Türkiýe Respublikasynyň Ankara şäherinde geçirilen Türkmenistanyň kino günleriniň çäklerinde türkmen milli kinematografiýasynyň halkara derejede uly ykrarnama eýe bolmagy hem munuň aýdyň güwäsidir.
Oguz han adyndaky «Türkmenfilm» birleşigi tarapyndan surata düşürilen «Kompozitor» atly filmiň TÜRKSOÝ-yň iki sany ýörite baýragyna mynasyp bolandygy ählimizi buýsandyrdy. Bu baýraklar «Garaşsyz, baky Bitarap Türkmenistan — bedew batly at-myradyň mekany» ýylynda gazanyljak ösüşleriň we türkmen medeniýetiniň täze üstünlikleriniň aýdyň nyşanyna öwrüldi.
Filmiň surata düşürilmegine ýakyndan ýardam eden Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bitiren uly hyzmatlaryny aýratyn nygtamak gerek. TÜRKSOÝ-yň bu asylly işe ýokary baha berip, gaznany «Goşa ganatly uly laçyn» atly baýrak bilen sylaglamagy türkmen halkynyň haýyr-sahawatlylyk ýörelgeleriniň halkara dabaralanmasydyr. Bu baýrak ýurdumyzda amal edilýän sogaply işleriň, ýaş nesilleriň zehinini açmaga we milli medeniýetimizi galkyndyrmaga gönükdirilen beýik tagallalaryň miwesidir. Gaznanyň hasabyna döredilen bu film haýyr-sahawatlylygyň sungat arkaly kalplara ýol tapýandygyny we dünýä halklarynyň arasynda medeni-ynsanperwer köprüleri gurýandygyny ýene bir gezek subut etdi.
Türkmen medeniýetiniň dünýä derejesinde dabaralanmagy ugrunda asylly işleri durmuşa geçirýän Milli Liderimiziň, hormatly Prezidentimiziň janlary sag, il-ýurt bähbitli, umumadamzat ähmiýetli beýik işleri elmydama rowaç bolsun!
Aýna ÇARYÝEWA,
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 3-nji ýyl talyby.
