Türkmenistany hem-de Amerikanyň Birleşen Ştatlaryny özara hormat goýmak, deňhukuklylyk ýörelgelerine esaslanýan köpýyllyk gatnaşyklar baglanyşdyrýar. Ýurtlarymyzyň arasynda diplomatik gatnaşyklaryň ýola goýlan pursadyndan bäri bu dialog yzygiderli ösdürilip, syýasatdan we ykdysadyýetden başlap, işewür hyzmatdaşlyga çenli ugurlaryň giň gerimini öz içine alýar. Gahryman Arkadagymyzyň Amerikanyň Birleşen Ştatlaryna amala aşyran sapary, onuň barşynda geçirilen netijeli duşuşyklar muňa bütin aýdyňlygy bilen şaýatlyk edýär.
Ilkinji nobatda, Gahryman Arkadagymyzyň dostlukly ýurda amala aşyran saparynyň çäklerinde «Nicklaus Companies» kompaniýasynyň ýolbaşçysy Jon Riz we kompaniýanyň ýolbaşçy düzüminiň wekilleri bilen duşuşandygyny bellemek gerek. Onda ikitaraplaýyn gatnaşyklaryň häzirki ýagdaýy we hyzmatdaşlygy mundan beýläk-de ösdürmegiň meseleleri ara alnyp maslahatlaşyldy. Hormatly Arkadagymyz Türkmenistanda ýokary netijeli sportuň, dynç alyş ulgamynyň we syýahatçylygyň ösdürilmegine möhüm ähmiýet berilýändigini, şunuň bilen baglylykda, bu ugurda häzirki zaman düzüminiň döredilendigini aýtdy. Munuň özi ýurdumyzda ählumumy durnukly ösüşiň strategik ugry hasaplanýar.
«Türkmenistan — ABŞ» işewürlik geňeşiniň Ýerine ýetiriji direktory Erik Stýuart bilen duşuşygynda Milli Liderimiz häzirki döwürde iki ýurduň işewür düzümleriniň bilelikdäki taslamalaryň durmuşa geçirilmegine işjeň gatnaşýandyklaryny belledi we netijeli hyzmatdaşlygy has-da giňeltmek üçin ägirt uly mümkinçilikleriniň bardygyna ünsi çekdi. Duşuşygyň dowamynda iki ýurduň arasynda maýa goýum hyzmatdaşlygyny ösdürmegiň möhüm ugurlaryň hatarynda kesgitlenendigi bellenildi.
Dostlukly ýurda saparynyň çäklerinde hormatly Arkadagymyz ýurduň tanymal syýasatşynaslary, işewürleri bilen duşuşdy. Işewürler Stiw Winn, Aýzek Perlmutter, «Oxbow Group» kompaniýasynyň dolandyryjylar geňeşiniň başlygy Wilýam Koh bilen duşuşygynda Milli Liderimiz häzirki döwürde Türkmenistanyň we ABŞ-nyň arasyndaky gatnaşyklaryň hil taýdan täze derejä çykýandygyny aýtdy. Şeýle hem köp sanly amerikan kompaniýalarynyň türkmen bazarynda netijeli iş alyp barýandyklary, ikitaraplaýyn gatnaşyklary mundan beýläk-de ösdürmek üçin ägirt uly mümkinçilikleriň bardygy nygtaldy.
Şeýlelikde, Gahryman Arkadagymyzyň Amerikanyň Birleşen Ştatlaryna amala aşyran sapary netijeli we işjeň geçen duşuşyklara, gepleşiklere baý boldy. Munuň özi Türkmenistanyň dünýäniň dürli ýurtlary bilen birek-birege hormat goýmak, ynanyşmak esasynda ýola goýulýan gatnaşyklar üçin açykdygynyň aýdyň güwäsidir. Bu saparyň jemleri Türkmenistan bilen ABŞ-nyň arasyndaky gatnaşyklaryň taryhynda täze möhüm sahypany açar.
Gülşat HAKYÝEWA,
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 2-nji ýyl talyby.
