9-njy fewralda Türkmenistanyň Ýaponiýadaky Ilçisi A. Baýramow Türkmen-ýapon ylmy-tehnologik assosiasiýasynyň Prezidenti H. Koýnuma hem-de bu assosiasiýa bilen hyzmatdaşlyk edýän ýapon kompaniýalarynyň wekilleri bilen duşuşyk geçirdi. Duşuşygyň dowamynda iki ýurduň arasynda ýola goýlan ylmy-tehnologik gatnaşyklary has-da ösdürmek we bu ugurda täze hyzmatdaşlyk platformalaryny döretmek meseleleri ara alnyp maslahatlaşyldy.
Türkmenistanyň Daşary işler ministrliginiň habar bermegine görä, gepleşikleriň esasy özeni ozaldan dowam edip gelýän ikitaraplaýyn gatnaşyklary pugtalandyrmakdan we türkmen bazaryna gyzyklanma bildirýän täze ýapon kompaniýalarynyň mümkinçiliklerini tanyşdyrmakdan ybarat boldy. Taraplar innowasion tehnologiýalaryň dürli pudaklara ornaşdyrylmagynyň geljegi uly ugurlaryna aýratyn üns berdiler.
Hususan-da, duşuşykda «Tohkemy Corporation» ýapon kompaniýasynyň suw arassalaýyş tehnologiýalary we degişli enjamlaryny Türkmenistanda ornaşdyrmak boýunça teklipleri gözden geçirildi. Bu ugurda amala aşyryljak işleriň ýurduň suw hojalygy ulgamynyň maddy-tehniki binýadyny dörebaplaşdyrmaga goşant goşjakdygy bellenildi.
Mundan başga-da, ýerasty baýlyklary gözlemekde kwant duýujylygyny ulanýan ýokary takyklykly anyklaýyş enjamlaryny hem-de suwuklandyrylan gaz önümçiliginde kömürturşy gazyny bölüp aýyrmak tehnologiýalaryna ýöriteleşen «Sustec» we «Carbon Cryo Capture Co., Ltd» ýaly kompaniýalaryň mümkinçilikleri tanyşdyryldy. Bu tehnologiýalaryň ornaşdyrylmagy energiýa serişdelerini netijeli ulanmakda we ekologiýa howpsuzlygyny üpjün etmekde möhüm ähmiýete eýedir.
