Aşgabatda ýerleşýän «Halk hakydasy» ýadygärlikler toplumynda türkmen halkynyň Milli Lideri, Türkmenistanyň Halk Maslahatynyň Başlygy hem-de Türkmenistanyň Prezidenti agzaçar sadakasyny berdiler. Agzaçar dabarasyna ýurduň müftüsi, ähli welaýatlaryň, Aşgabat we Arkadag şäherleriniň ymamlary, hormatly ýaşulular, dili senaly eneler hem-de köp sanly ýaşlar gatnaşdy. Bu barada «Watan» habarlar gepleşiginde habar berildi.
Hajy Arkadag Gurbanguly Berdimuhamedow mübärek Oraza aýynda, aýratyn-da Gadyr gijesiniň öňüsyrasynda il bolup agzaçar sadakasyny bermegiň sogap işdigini belläp, aýat-töwirleriň okalýandygyny hem-de ýagşy dilegleriň edilýändigini aýtdy. «Halkymyzyň doga-dilegleri, berýän sadakalary Allatagallanyň dergähinde kabul bolsun!» diýip, Milli Lider öz arzuwlaryny beýan etdi.
Dabarada Türkmenistanyň müftüsi hem çykyş edip, hajy Arkadagymyzyň we Arkadagly hajy Serdarymyzyň berýän sadakalarynyň kabul bolmagyny dileg etdi. Tebärekden soňra agzaçar sadakasyna gatnaşýanlara dürli tagamlar hödürlenildi.
