18-nji martda Söwda-senagat edarasynda «Türkmenistanyň geljegine maýa goýumlar» atly hususy pudaga maýa goýumlary çekmek boýunça halkara forum geçirildi. Türkmenistanyň Senagatçylar we telekeçiler birleşmesiniň döredilmeginiň 18 ýyllygy mynasybetli serginiň çäklerinde guralan bu forum ýurdumyzyň hususy pudagynyň maýa goýum mümkinçiliklerini ara alyp maslahatlaşmak, tejribe alyşmak, döwletiň we hususy bölegiň arasynda hyzmatdaşlygy ösdürmek üçin möhüm meýdança öwrüldi.
Oňa Ministrler Kabinetiniň Başlygynyň söwda toplumyna gözegçilik edýän orunbasary, ministrlikleriň, pudaklaýyn dolandyryş edaralarynyň, halkara maliýe institutlarynyň wekilleri, Senagatçylar we telekeçiler birleşmesiniň agzalary, daşary ýurt kompaniýalarynyň wekilleri gatnaşdylar. Bu çäräniň giň wekilçilikli düzümi Türkmenistanyň maýa goýum mümkinçiliklerine gyzyklanmanyň barha artýandygyna şaýatlyk edýär.
Forumyň işi «Döwlet-hususy hyzmatdaşlygy hem-de döwlet goldawy — ykdysady ösüşiň girewi», «Hususy pudagyň oba hojalygyny ösdürmek boýunça mümkinçilikleri we azyk howpsuzlygyny üpjün etmekde eýeleýän orny», «Ykdysadyýetiň hususy pudagy we infrastruktura: gurluşyk, senagat we ulag ulgamlaryna maýa goýumlar», «Sanly Türkmenistan: maýa goýum gurşawynyň kämilleşdirilmegi» atly bölümçelerde dowam etdi.
Ikitaraplaýyn duşuşyklaryň dowamynda türkmen telekeçileri we daşary ýurt işewür toparlarynyň wekilleri kesgitlenen meýilnamalary durmuşa geçirmäge taýýardyklaryny nygtadylar. Forum göni gatnaşyklary ýola goýmak, geljekki hyzmatdaşlygyň ugurlaryny kesgitleýän resminamalaryň toplumyna gol çekmek üçin netijeli meýdança bolup hyzmat etdi.
«THE ASHGABAT TIMES».
