Biri-birinden zyýada gelýän ýyllar halkymyzyň ykbalyna bagtyýarlyk, rowaçlyk hem-de ösüş-özgerişler getirýär. Bagta beslenýän aý-günler Berkarar döwletiň täze eýýamynyň Galkynyşy döwründe ata Watanymyzyň taryhynda täze sahypalary açyp, ýurdumyzy ynamly gadamlar bilen belent maksatlara tarap alyp barýar. Şoňa görä-de, şu ýylymyzyň «Garaşsyz, baky Bitarap Türkmenistan — bedew batly at-myradyň mekany» ýyly diýlip atlandyrylmagy syýasy-jemgyýetçilik taýdan ýokary ähmiýete eýedir.
Täze taryhy döwrümizde Milli Liderimiziň döwletli başlangyçlary hem-de hormatly Prezidentimiziň parasatly syýasaty netijesinde milli ykdysadyýetimiziň ähli ugurlarynda uly öňegidişlikler gazanylýar. Ýurdumyzyň ösüş ýolunyň her tapgyry üstünliklere, şanly wakalara baý bolup, şöhratly taryhymyza altyn harplar bilen girýär. Her ýylyň döwrebap atlandyrylyp, jemgyýetçilik-syýasy ähmiýetli şygarlar bilen dabaralandyrylmagy halkymyzyň agzybirligini, ruhy bitewüligini pugtalandyrýan möhüm ýörelgä öwrüldi. 2026-njy ýylymyzyň şygary hem döwletimiziň gazanan beýik üstünlikleriniň, ösüş depginleriniň aýdyň beýanydyr. Biz bu ýylda ýurdumyzyň mukaddes Garaşsyzlygynyň şanly 35 ýyllygyny ýokary ruhubelentlikde garşy alýarys.
Häzirki döwürde bedew batly ösüşler ýurdumyzyň ähli ugurlarynda aýdyň görünýär. Şunda şanly ýylymyzyň şygarynda mukaddes Garaşsyzlygymyzyň we hemişelik Bitaraplygymyzyň goşa mukaddeslik hökmünde şöhlelenmegi çuňňur mazmuna eýedir. Berkarar döwletimiziň ösüş depgini hut şu goşa mukaddeslikden gözbaş alyp, halkymyzyň abadan durmuşynyň kepiline öwrülýär. Çünki Gahryman Arkadagymyzyň belleýşi ýaly, «Garaşsyzlyk hem Bitaraplyk biziň döwletliligimiziň goşa ganatydyr».
Şu günler ýurdumyzyň çar künjünde bedew atlarymyz bilen bagly, ýylyň şygaryna bagyşlanan çäreler barha giň gerim alýar. Behişdi bedewleri dünýä beren nurana Diýarymyz — toý-baýramlaryň mekany. Bedew ýylynda bolsa mukaddes Garaşsyzlygymyzyň şanly 35 ýyllygy baýram ediler. Toýlaryň ýaraşygy bolan behişdi bedewlerimiz ady bilen, okgunly bady bilen türkmen ruhuny dünýä ýaýýar. Ýakynda Monakonyň Monte-Karlo şäherinde geçirilen 48-nji halkara sirk sungaty festiwalynda «Galkynyş» milli at üstündäki oýunlar toparyna sirk sungatyna goşan uly goşandy üçin Bütindünýä sirk federasiýasy hem-de Ýewropa Sirk assosiasiýasy tarapyndan halkara şahadatnamalaryň gowşurylmagy hem şanly ýylyň rowaç menzilleriniň özboluşly badalgasyna öwrüldi.
Merjen MUHAMMEDOWA,
Türkmenistanyň Serhet institutynyň uly mugallymy.
