Daşky gurşawy gorap saklamak, tebigy baýlyklary nesillere miras galdyrmak, ýaşlarda ekologiýa medeniýetliligini kemala getirmek üçünji müňýyllygyň iň wajyp meseleleriniň biridir. Şoňa görä-de, ýurdumyzda her ýylyň ýaz hem-de güýz möwsümlerinde ählihalk bag ekmek dabaralaryny geçirmek asylly däbe öwrüldi. Ýurdumyzda geçirilen ählihalk bag ekmek dabarasy hem ata Watanymyzy bagy-bossanlyga öwürmekde, tokaý zolaklaryny döretmekde, ekilen bag nahallaryna talabalaýyk ideg etmekde, ýaş nesillerde tebigata söýgini kemala getirmekde möhüm ähmiýete eýe bolar.
Gahryman Arkadagymyzyň «Ömrümiň manysynyň dowamaty» kitabynda belleýşi ýaly, «Bag ekmek halkymyzyň milli dessurydyr». Bu ýörelge häzirki wagtda döwlet derejesinde ilerledilip, ol halkymyzyň ýaşaýyş joşgunyny, geljege bolan ynamyny, rysgal-bereketliligi alamatlandyrýar. Soňky ýyllarda paýtagtymyz Aşgabadyň, häzirki zaman binagärlik sungatynyň taýsyz merjeni bolan Arkadag şäheriniň hem-de Diýarymyzyň ähli künjekleriniň ýaşyl begrese beslenmegi, seýilgähleriň sanynyň yzygiderli artmagy munuň aýdyň subutnamasydyr.
Ata-babalarymyz asyrlaryň dowamynda tebigata aýawly çemeleşmegiň we onuň bilen sazlaşykly ýaşamagyň özboluşly ýörelgelerini kemala getiripdirler. Pederlerimiz bag ekmegi sogaply iş hasaplap, täze öý gurunjak bolsalar, ilki bilen, bag nahallaryny oturdypdyrlar. Şeýle-de halkymyzda daragtlaryň sanynyň näçe köp boldugyça, şol ojagyň rysgal-berekediniň has köpelýändigi baradaky ynanjyň bardygyny bellemek gerek. «Bir nahal ekseň, ýaşyň baky», «Bagym bar, barym bar», «Bir ýyl tut ekseň, ýüz ýyl altyn alarsyň», «Bag — ekeniňki, ýap — çekeniňki» diýen halk paýhasynyň dürüne öwrülen nakyllar hem şu hakykatdan gözbaş alýar.
Tebigat adamyň ýokary ahlak duýgularynyň kemala gelmeginiň gözbaşynda durýan hemişelik giňişlikdir. Adam — tebigat gatnaşygy örän uly sazlaşyk bolup, ol ynsana ähli aladalaryny bir pursatlyk unutmaga, dünýä paýhasly nazar bilen garamaga, şeýle hem «tebigat bilen sözleşmäge» mümkinçilik berýär. Şundan ugur alsak, bag nahallaryny oturdyp, tebigatyň gözelligine gözellik goşmak, fiziki taýdan taplanyp, ruhy jähetden dynç almak öz-özüňi kämilleşdirmek bilen bir hatarda, hakyky raýatlyk we adamkärçilik borjuňy berjaý etmekdir. Bu asylly iş ýaş nesillere tebigatyň tutuş adamzadyň gymmatly hazynasydygyny düşündirmäge ýardam edip, olarda daşky gurşawy gorap saklamagyň zerurdygyna bolan ynanjy terbiýeleýär, mähriban topragymyza bolan söýgini artdyrýar.
Halbibi SATLYKOWA,
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 5-nji ýyl talyby.
