Gyşyň ak garynyň eremegi we zeminiň ýyly mährine gowuşmagy bilen tebigat täzeden oýanyp başlaýar. Bahar — bu durmuşyň täze sahypasynyň açylýan, umytlaryň gunça ýarýan we dünýäniň iň owadan lybasyna bürülýän pursatydyr. Bu pasylda asmanyň dury mawy reňki, meýdanlaryň ýaşyl maýsalary we baglaryň akja gülleýşi ynsanyň kalbynda özboluşly şatlyk hem-de joşgun döredýär. Salkyn şemalyň öwüşgini bilen gelýän ýakymly ys, gumry-gugularyň saýramagy tebigatyň uly bir sazlaşygyny emele getirýär.
Dag eteklerinde al-elwan bolup açylýan çigildemler we çölüň jümmüşindäki sähra gülleýşi gözleriňi dokundurýar. Baharyň gelmegi bilen daýhanlaryň kalbynda täze hasylyň, täze bereketiň düýbi tutulýar. Ýeriň sürülmegi, ilkinji tohumlaryň sepilmegi geljekki bolçulygyň buşlukçysydyr. Şonuň üçin hem bu pasyl zähmetkeş halkymyz üçin hem aýratyn ähmiýete eýedir. Baharyň ýagyşlaryndan soňra emele gelýän älemgoşaryň lowurdysy we köňülleri awunýan dury howa her bir ynsanyň ruhuny täzeleýär.
Halkymyzyň gadymy hem-de milli baýramy bolan halkara Nowruz baýramy hem hut şu pasylda bellenilip geçilýär. Nowruz baharyň, agzybirligiň we dostlugynyň nyşany hökmünde kalplary birleşdirýär. Saçaklaryň bereketi bolan semeni taýýarlanylanda, adamlaryň arasyndaky mähir has-da artýar. Bu pasyl bize her gezek dünýäniň hemişe täzelenip durýandygyny, durmuşyň bolsa dowam edýän ajaýyp bir gudratdygyny ýatladýar. Şeýlelikde, bahar pasly diňe bir ýylyň wagty däl, eýsem gözelligiň, söýginiň we baky ýaşaýşyň beýanydyr.
Güljan GURBANOWA,
Seýitnazar Seýdi adyndaky TDMI-niň Pedagogika fakultetiniň başlangyç bilim mugallymçylygy we psihologiýasy hünäriniň 104-nji toparynyň talyby.
