Ylym- bilimiň barha kämilleşýän zamanasynda hünärleri kämilleşdirmek, okuwçylara mynasyp bilim-terbiýe bermek bilen bagly wezipeleri durmuşa geçirmäge uly mümkinçilikler döredilýär. Döredijilikli zähmet çekmek ugrundaky ajaýyp şertlerden peýdalanyp, biz hem okatmagyň usullaryny has-da kämilleşdirmäge çalyşýarys.
Ak mekdebe ýaňyja gadam basan okuwçylary sapaklara höweslendirmekde dürli usullary peýdalanýarys, olaryň okuw derslerini öwrenmäge, temalary mynasyp özleşdirmäge bolan gyzyklanmalaryny kanagatlandyrmakda öwrediji oýunlar sapaklarymyzyň içinden eriş-argaç bolup geçýär. Hormatly Prezidentimiziň birinji synp okuwçylaryna sowgat berýän kompýuterlerinden ruhlanyp, başlangyç synp okuwçylar döwrebap guralýan sapaklara has işjeň gatnaşýarlar. Türkmenistanda sanly bilim mümkinçilikleriniň artdyrylmagy bolsa, bizi has işjeň sapaklary guramaga itergi berýär.
Biz hem sapaklarymyzda elektron serişdelerden, elektron gollanmalardan, audio we wideo ýazgylardan, media eserişdelerinden, ekran eserlerinden peýdalanyp, sapaklarymyzy ýokary hilli guramaga çemeleşýäris. Bu ugurda halkara we milli tejribeleri öwrenmek, özleşdirmek we öz usulyýetimize ornaşdyrmak, toplan tejribelerimizi paýlaşmak maksady bilen Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasyndan ugur alyp, iş tejribämizden usuly gollanmalary hem döredýäris. Munuň özi başlangyç bilim babatda usuly goruň üstüni ýetirmekde, özara tejribeleri alyşmakda we ýaýratmakda netijelidir.
Mekdep okuwçylarynyň döwrebap we sagdyn düşünjeli, aň we beden taýdan sagdyn ösdürilmegi ugrunda toplumlaýyn çäreleri, pedagogik we terbiýeçilik işleri, synpdan daşary çäreleri, ata-eneler bilen bilelikdäki işleri mundan beýläk hem netijeli gurap, ata Watanymyzyň ösüşlerine mynasyp goşant goşmak biz ― mugallymlar üçin uly buýsanç hem-de belent derejedir.
Ejebaý HOJATOWA,
Garagum etrabynyň 16-njy orta mekdebiniň başlangyç synp mugallymy.
