«Garaşsyz, baky Bitarap Türkmenistan — bedew batly at-myradyň mekany» diýlip atlandyrylan ýylymyz, halkymyzyň täze taryhy eýýamdaky beýik maksatlaryna tarap okgunly öňe barýandygynyň aýdyň nyşanydyr. Bu şygar özünde mukaddes Garaşsyzlygymyzyň gadyr-gymmatyny, hemişelik Bitaraplygymyzyň parahatçylyk söýüjilikli ýörelgelerini we halkymyzyň asyrlar aşyp gelýän asylly arzuw-niýetlerini jemleýär.
Ýylyň adynda agzalýan «bedew batly» we «at-myrat» diýen düşünjeler, ýurdumyzyň ykdysady, syýasy we medeni ulgamlarda gazanýan üstünlikleriniň çaltlygyny hem-de şol ösüşleriň her bir ynsanyň bagtyýar durmuşyna gönükdirilendigi alamatlandyrýar. Şoňa görä-de, bu ýyl her bir türkmenistanly üçin täze zähmet ýeňişleriniň we belent sepgitleriň ýylyna öwrülýär.
Berkarar döwletiň täze eýýamynyň Galkynyşy döwründe amala aşyrylýan giň göwrümli özgertmeler ýurdumyzyň her bir künjeginde özüniň oňyn netijelerini berýär. Täze gurulýan döwrebap şäherler, senagat kärhanalary, ylym-bilim ojaklary we medeniýet merkezleri Türkmenistanyň dünýäniň iň okgunly ösýän döwletleriniň birine öwrülendigini subut edýär. Ahalteke bedewlerimiziň batly gadamlaryna meňzedilýän bu ösüşler, ýurdumyzyň halkara abraýynyň belende galmagyna we dünýä jemgyýetçiligi bilen dostlukly gatnaşyklaryň täze derejä çykmagyna giň ýol açýar.
Halkymyzyň agzybirligi we Arkadagly Gahryman Serdarymyzyň parasatly ýolbaşçylygy bilen bellenen bu şygar ýaş nesilleri täze döredijilikli gözleglere we Watana bolan söýgä ruhlandyrýar. Arzuwlaryň hasyl bolýan mekany hökmünde tanalýan eziz Diýarymyzda, ynsan mertebesi we halk bähbidi ähli zatdan ýokarda tutulýar. Ýylyň dowamynda gazanylýan her bir üstünlik geljekki beýik ýeňişleriň berk binýadydyr. «Garaşsyz, baky Bitarap Türkmenistan — bedew batly at-myradyň mekany» diýen şygar astynda öňe barýan ýurdumyz özüniň parahatçylyk we ösüş ýoly bilen bütin dünýä nusgalyk görelde görkezýär.
Gülnahal MYRATGELDIÝEWA,
Seýitnazar Seýdi adyndaky TDMI-niň Pedagogika fakultetiniň 1-nji ýyl talyby.
