Häzirki wagtda ýurdumyzyň bilim ulgamy düýpli özgerişlere beslenýär. Çünki kämil nesil döwletiň kuwwatydyr, geljegidir. Bu beýik maksada barýan ýolda başlangyç synplar bilim dünýäsiniň ilkinji basgançagy, şol bir wagtyň özünde iň möhüm sütünidir. Men ― başlangyç synp mugallymy hökmünde, her gün synpa girenimde diňe bir okuwçylary däl, eýsem, geljegiň inženerlerini, lukmanlaryny we alymlaryny görýärin.
Başlangyç synp mugallymynyň wezipesi diňe bir harplary we sanlary öwretmek bilen çäklenmeýär. Biz çagalaryň aňyna ynsanperwerlik, zähmetsöýerlik we Watana bolan gyzgyn söýgi ýaly mukaddes duýgulary guýýarys. Çaga ilkinji gezek «Watan», «Ene-ata», «Mugallym» diýen sözleriň manysyny we mukaddesligini hut şu döwürde öwrenip başlaýar. Şol sebäpli hem biziň her bir sözümiz, her bir hereketimiz olaryň geljekki häsiýetiniň binýadyny tutýar.
Häzirki zaman başlangyç biliminde sanly ulgamyň we innowasion usullaryň orny örän uludyr. Biz öz sapaklarymyzda multimedia serişdelerini, interaktiw oýunlary we sanly bilim platformalaryny giňden ulanýarys. Bu bolsa çagalaryň okuwa bolan höwesini artdyrýar, olaryň döredijilikli pikirlenmesine ýol açýar. Her bir çaganyň aýratyn ukybyny ýüze çykarmak, olaryň zehinini dogry ugra gönükdirmek biziň esasy borjumyzdyr.
Netijede, Gahryman Arkadagymyzyň we hormatly Prezidentimiziň bilim ulgamyna berýän uly ünsi we goldawy mugallymlary has-da joşgunly zähmet çekmäge ruhlandyrýar. Biz — mugallymlar, ýurdumyzyň ýagty geljegi üçin ak ýürekden hyzmat etjek, kämil, bilimli we watansöýüji nesilleri ýetişdirmek ugrunda bar güýç-gaýratymyzy sarp ederis.
Şerapat DURDYÝEWA,
Lebap welaýatynyň Çärjew etrabynyň 29-njy orta mekdebiniň başlangyç synp mugallymy.
