Çagalar ― bu biziň durmuşymyzyň gymmatlygy we geljegimiziň daýanjydyr. Perzent barada arzuwlaryňa ýetmek köp tagallalary talap edýär. Olaryň biri hem çaga düşünmek we öz mähriňi duýdurmakdyr. Her bir ene-atanyň çagasyna bolan söýgüsi çäksizdir. Onda näme üçin, käbir çagalar ene-atasy özüni gowy görmeýändir öýdýärler?
Ata-ene çagasyny elmydama gowy görýär, ýöne köplenç halatlarda ony çagasyna bildirmeýär. Çaganyň düşünýän dili bilen ony gowy görýändigini düşündirmeýär. Ene-atalaryň köpüsi çagasyna uly adamlaryň gözi bilen garaýar, gowy görülýändigine çaganyň düşünmegini isleýärler. Ene-atalar özleri iýmän çagalaryna iýdirmekligi, geýmän geýdirmekligi saýlap, ähli gazançlaryny çagalaryň okuwly-bilimli bolmagy üçin harçlaýarlar. Geljekde hem çagalarynyň dogry durmuş ýoluny saýlap alyp, gowy okap, bilim alyp, jemgyýete peýdaly we wepaly adam bolup ýetişmegini isleýärler.
Tanymal pedagog Osman Kurtkan Kapyjyoglu çagalaryň gowy görülýändigini bilmekleri üçin, olary gowy görýändigiňizi diňe dilde aýtmagyň ýeterlikli däldigini, bu duýgyny hereketleriňiz arkaly görkezip, olar bilen içgin gyzyklanmagyň, wagtyňy köpräk bile geçirmegiň gerekdigini aýdýar. Mysal üçin, agşam işden ýadap gelýärsiňiz. Öýde bir salym telewizora tomaşa edýänsiňiz ýa-da gazet-žurnallara göz gezdirýänsiňiz. Şol pursat kiçijik gyzyňyz ýanyňyza ylgap gelip, şol günki çeken suratyny görkezse, sizem oňa göwünli-göwünsiz seredip: «Gowy bolupdyr» diýip, başdan sowma jogap berseňiz, gyzyňyz özüniň eden işine siziň ähmiýet bermeýändigiňize düşüner. Gyzyňyzyň: «Kakam meni gowy görýär» diýip pikir etmegi üçin, oňa az hem bolsa hökman wagt sarp edip, onuň bilen gyzyklanmaly.
Netijede, ulynyň her bir sözüniň we hereketiniň ýaşlara nusga bolýandygyna biz durmuş tejribesinde duş gelýäris. Çünki Gahryman Arkadagymyzyň belleýşi ýaly: «Adam ýaşy näçe bolsa-da, özüniň ýaşlygynda alan terbiýesi, görüm-göreldesi, edep-ekramy esasynda özüni kämilleşdirýär. Ýaşlygynda, hususan-da çagalyk ýyllarynda maňzyna guýlan edep zandyňa ornaýar».
Zülfiýa HEMRAÝEWA,
Lebap welaýatynyň Çärjew etrabynyň 3-nji çagalar bakja-bagynyň terbiýeçisi.
