Häzirki zaman bilim ulgamynda ýaş nesle diňe bir nazary bilim bermek däl, eýsem, olary milli gymmatlyklarymyza sarpaly, kämil şahsyýetler edip ýetişdirmek esasy wezipeleriň biri bolup durýar. Bu mukaddes işde türkmen dili we edebiýaty mugallymlaryna aýratyn jogapkärçilik degişlidir.
Dil diňe bir aragatnaşyk serişdesi däl, eýsem, milletiň ruhy pasportydyr. Mekdep ýyllarynda okuwçylaryň dil baýlygyny artdyrmak, olara sözüň güýjüni duýdurmak — geljekki zehinleriň düýbüni tutmakdyr. Grammatikanyň kadalaryny öwretmek bilen bir hatarda, çagalarda öz ene diline bolan buýsanjy oýarmak mugallymyň baş ukybydyr.
Edebiýat sapaklarynda nusgawy şahyrlarymyzyň we söz ussatlarymyzyň döredijiligini öwrenmek okuwçylarda ynsanperwerlik, watansöýüjilik we ahlaklylyk ýaly häsiýetleri kemala getirýär. Şahyrlaryň eserlerindäki çuňňur pelsepe okuwçynyň durmuş hakykatyna akyl ýetirmegine kömek edýär. Kitap ynsan paýhasynyň hazynasydyr, biz bolsa şol hazynanyň gapysyny okuwçylarymyz üçin hemişe giňden açmalydyrys.
Şu günki günüň mugallymy diňe bir öwrediji bolman, eýsem, gyzykly söhbetdeş we täze tehnologiýalary ulanmagy başarýan ussat bolmalydyr. Sanly bilim ulgamynyň mümkinçiliklerinden peýdalanyp, interaktiw usullar arkaly sapaklary gyzykly guramak, edebi gahrymanlaryň keşplerini sahnalaşdyrmak hem-de okuwçylaryň döredijilik ukybyny oýarmak bilim bermegiň hilini ýokarlandyrýar.
Netije edip aýtsak, türkmen dili we edebiýaty dersi okuwçynyň diňe bir sowatlylygyny däl, eýsem onuň ýüregini terbiýeleýär. Biz – mugallymlar her bir sözi we her bir eseri çagalaryň aňyna ýetirmek bilen, Watanymyzyň röwşen geljegi üçin ruhy taýdan kämil nesilleri ýetişdirýäris.
Laçyn ROZYBAÝEWA,
Çärjew etrabynyň 20-nji orta mekdebiniň türkmen dili we edebiýaty mugallymy.
