Türkmenistanyň Daşary işler ministrliginiň Halkara gatnaşyklary instituty tarapyndan Bilim ministrliginiň hem-de Daşary işler ministrliginiň ýardam bermeginde talyplaryň we magistrantlaryň arasynda III halkara bäsleşigi yglan edildi.
Türkmen, iňlis we rus dillerinde alnyp barylýan bu çäräniň maksady Bitarap Türkmenistanyň halkara başlangyçlaryny dabaralandyrmak, «Dialog ― parahatçylygyň kepili» filosofiýasyny ýaşlaryň arasynda ýaýmak we dünýäniň ylym-bilim merkezleri bilen dostlukly gatnaşyklary berkitmekden ybaratdyr.
Bäsleşige ýurdumyzyň we daşary döwletleriň ýokary okuw mekdeplerinden 1-den 5-e çenli talypdan ybarat bolan toparlar gatnaşyp bilerler. Bäsleşigiň şerti hökmünde gatnaşyjylar halkara gatnaşyklary, diplomatiýa, taryh, medeniýet, ekologiýa we durnukly ösüş maksatlary ýaly giň ugurlary öz içine alýan 100 soragdan ybarat bolan test ýumuşlaryny ýerine ýetirerler. Eminler topary tarapyndan iň ýokary netije görkezen ýaşlar seljerilip, ýeňijiler kesgitleniler.
Bäsleşigiň ýeňijilerine altyn, kümüş we bürünç medallar, şeýle hem degişli derejeli diplomlar we gymmat bahaly sowgatlar gowşurylar. Guramaçylar tarapyndan bäsleşigiň çäklerinde daşary ýurtly myhmanlar üçin ýörite medeni we tanyşdyryş gezelençleri hem meýilleşdirildi.
Bäsleşik baradaky has giňişleýin maglumatlar we gatnaşmak üçin sargytnamalaryň nusgalary institutyň iirmfa.edu.tm resmi internet sahypasynda ýerleşdirildi.
«THE ASHGABAT TIMES».
