Ahalteke bedewlerimiz — halkymyzyň uçar ganaty, ösüş-özgerişlerimiziň nyşany, ata-babalarymyzyň janly mirasydyr. Şoňa görä-de, parahatsöýüji Watanymyzyň ösüş ýolunyň «bedew batly ösüşler» diýlip beýan edilmeginde uly many bar. Çünki türkmen bedewleri ýyndamlygy, gözelligi, umuman, birnäçe aýratynlyklary bilen öňe saýlanýar. Bu bolsa halkymyzyň atşynaslyk sungaty bilen has irki döwürlerden bäri meşgullanyp gelýändigini alamatlandyrýar.
Milli Liderimiziň başyny başlan döwletli başlangyçlaryny üstünlikli dowam etdirýän Arkadagly Gahryman Serdarymyzyň tagallalary bilen häzirki wagtda ýurdumyzyň atçylyk pudagyny ösdürmekde giň gerimli işler durmuşa geçirilýär. Şeýle döwletli işleriň netijesinde türkmen atşynaslary milli tejribelerimizi dünýä tejribeleri bilen utgaşdyryp, bu ugurda uly üstünlikleri gazanýarlar. Şunda ahalteke atçylyk sungatynyň we atlary bezemek däpleriniň ÝUNESKO-nyň Adamzadyň maddy däl medeni mirasynyň sanawyna girizilmegi milli hem-de dünýä medeniýetiniň gymmatlygy hasaplanýan ahalteke bedewleriniň at-abraýynyň has-da belende göterilýändigini, dünýä jemgyýetçiligi tarapyndan giň goldawa eýe bolýandygyny mälim edýär.
Türkmen bedewiniň şan-şöhraty bu gün Ýer ýüzüni haýran galdyrýar. Şunda Halkara ahalteke atçylyk assosiasiýasynyň döredilmegi we onuň ştab-kwartirasynyň paýtagtymyz Aşgabat şäherinde ýerleşdirilmegi dünýäniň dürli döwletleri bilen bu ugurda alnyp barylýan halkara gatnaşyklaryň gerimini giňeltmäge hem-de ýakyn hyzmatdaşlygy saklamaga uly mümkinçilik berýär. Ýurdumyzyň welaýatlarynda dünýä ölçeglerine laýyk gelýän atçylyk sport toplumlarynyň, okuw-ylmy merkezleriniň, athanalaryň gurulmagy bolsa aýratyn bellärliklidir.
Ahalteke bedewlerimiziň gazanýan ýeňişleri olaryň näderejede ýyndamlygyndan, gözelliginden habar berip, türkmen atşynaslarynyň we seýisleriniň köpasyrlyk atçylyk tejribesini, tälimlerini, zehinini we ussatlygyny dünýä äşgär edýär. Ýeri gelende, Monte-Karlo halkara sirk sungaty festiwalynda «Galkynyş» milli at üstündäki oýunlar toparyna sirk sungatyna goşan uly goşandy üçin Bütindünýä sirk federasiýasy hem-de Ýewropa Sirk assosiasiýasy tarapyndan halkara şahadatnamalaryň gowşurylmagy aýratyn bellärliklidir. Dünýä ýüzünde uly meşhurlyga eýe bolan «Galkynyş» milli at üstündäki oýunlar toparynyň «Garaşsyz, baky Bitarap Türkmenistan — bedew batly at-myradyň mekany» ýylymyzyň ilkinji aýynda gazanan halkara ýeňşi geljekki üstünlikleriň we ýetiljek täze sepgitleriň buşlukçysydyr.
Kasymmyrat DURDYÝEW,
Ýagşygeldi Kakaýew adyndaky Halkara nebit we gaz uniwersitetiniň mugallymy.
