Mugallymçylyk hünäri diňe bir nazary bilimleri bermek däl, eýsem ynsan kalbyny terbiýelemek sungatydyr. Bu mukaddes ýolda kämilleşmegiň, hünär ussatlygynyň inçe syrlaryna aralaşmagyň iň ygtybarly we synagdan geçen usuly bolsa asyrlar aşyp gelýän halypa-şägirtlik mekdebidir. “Halypa bolmasa, hünär ýok” diýen pähimden ugur alýan halkymyz üçin bu ýol diňe bir iş tejribesi däl, eýsem uly durmuş mekdebi bolup hyzmat edýär.
Ýaş mugallym üçin ilkinji ädimler elmydama gözlegler we käbir kynçylyklar bilen utgaşýar. Kitaplarda berilýän maglumatlar mugallymçylyk işiniň sütünini düzse-de, okuwçylar bilen aragatnaşyk gurmagyň, her bir çaganyň häsiýetine görä çemeleşmegiň syrlaryny diňe tejribeli halypanyň ýanynda öwrenip bolýar. Halypa mugallym öz şägirdine sapagy nähili gyzykly guramagy, wagty dogry dolandyrmagy we çylşyrymly temalary ýönekeý dilde düşündirmegiň usullaryny öwredýär. Bu bolsa ýaş hünärmeniň özüne bolan ynamyny artdyrýar we hünär derejesiniň çalt ýokarlanmagyna ýardam edýär.
Halypa-şägirtlik gatnaşyklary diňe hünär öwretmek bilen çäklenmeýär. Mugallymçylykda halypanyň şahsyýeti, onuň sabyrlylygy, işine bolan wepadarlygy we adamkärçilik sypatlary şägirt üçin nusgalyk mekdepdir. Halypasynyň okuwçylara bolan mährini, kärdeşleri bilen sylaşygyny we jemgyýetdäki abraýyny görýän ýaş mugallym şol derejä ýetmäge çalyşýar. Şeýlelikde, bu mukaddes ýol mugallymçylyk etikasynyň nesilden-nesle kämil görnüşde geçmegini üpjün edýär.
Häzirki döwürde bilim ulgamynda täze tehnologiýalar we döwrebap usullar giňden ulanylsa-da, halypanyň öwüt-ündewiniň orny elmydama üýtgewsiz galýar. Ýaşlaryň täzeçe garaýyşlary bilen halypalaryň baý tejribesi utgaşanda, bilim bermegiň hili has-da ýokarlanýar. Halypasyna hormat goýýan şägirt, geljekde özi hem hakyky halypa bolup ýetişýär.
Netije hökmünde aýtsak, halypa-şägirtlik ýoly mugallymçylyk kesbininiň ruhy sütünidir. Bu ýörelge dowam etdigiçe, bilim ojaklarynda öz kärini söýýän, kämil we Watana wepaly mugallymlar kemala gelmegini dowam eder.
Ferangiz KADYROWA,
Seýitnazar Seýdi adyndaky TDMI-niň Pedagogika fakultetiniň 2-nji ýyl talyby.
