Berkarar döwletiň täze eýýamynyň Galkynyşy döwründe ýurdumyzda bilim ulgamyny döwrebaplaşdyrmak, milli pedagogikanyň häzirki zaman ösüşlerini gazanmak üns merkezinde saklanýar. Şoňa görä-de, ýurdumyzda bilim-terbiýeçilik edaralarynyň işini kämilleşdirmäge, pedagogik işgärleriň hünär ussatlygyny ýokarlandyrmaga gönükdirilen wezipeler döwlet Maksatnamalaryndan, bilim ulgamyny döwrebaplaşdyrmagyň resmi esaslaryndan ugur alnyp amala aşyrylýar. Bu ugurda Mary welaýatynyň mekdebe çenli bilim-terbiýe düzümlerinde hem tassyklanylan meýilnamalar esasynda öňde goýlan guramaçylyk, okuw-usulyýet çäreleri netijeli alnyp barylýar.
«Garaşsyz, baky Bitarap Türkmenistan ― bedew batly at-myradyň mekany» ýylymyzda hem Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasyndan gelip çykýan wezipeleri üstünlikli durmuşa geçirmek, okatmagyň usulyýetini kämilleşdirmekde terbiýeçileriň we mugallymlaryň okuw maksatnamasy boýunça geçýän sapaklaryny we usullaryny öwrenmek, gazanylan tejribeleri ýaýratmak, esasan hem, sanly maglumat goruny baýlaşdyrmak ýaly maksatlardan ugur alnyp, sapak pursatlaryndan alnan fotosuratlaryň elektron bukjasynyň döredilendigi hem bu uguraky guramaçylyk çäreleriniň bir mysalydyr.
Sapak pursatlary boýunça Mary welaýatynyň etrapdyr, şäherlerinden onlarça çagalar bakja-baglarynda okuw-terbiýeçilik işlerinden alnan fotosuratlar bir bitewi elektron bukjada ýerleşdirilip, olardaky pursatlar çagalara bilim berlişiniň hilini, mazmunyny, sapaklarda peýdalanylýan okuw görkezme, paýlama esbaplaryny, bilim işgäriniň işjeňligini, sapak geçilýän ýeriň talabalaýyklygyny, çagalaryň aň-beden taýdan ösüşini, peýdalanylýan täze usullary beýan edýär. Bu welaýatyň çäginde özara tejribeleri alyşmakda, tapawutly we täzeçil mazmunly pursatlar arkaly tejribeleri öwrenmekde netijelidir.
Şeýle usuly işleriň guralmagy pedagogik işgärlerde öz hünärine söýgi döredip, ähli pursatlarda hem maksadalaýyk işlemäge bolan höwesleri artdyrýar. Elbetde, iş pursatlaryndan foto toplumyň döredilmegi we dürli pursatlaryň surata düşürilmegi täze öwrenilýän we durmuşa geçirilýän usullar hakynda hünärmenler tarapyndan uly gyzyklanma bildirilýändigine, terbiýeçileriň yhlasly zähmetiniň hemişe görülýändigine we üns merkezinde saklanylýandygyna düşünmeklerine itergi berýär.
Şeýle pedagogik işlere diňe bir resmi taýdan däl-de, ynsanperwer nukdaýnazardan seredilende hem ähmiýetlidir. Şeýle pursatlaryň elektron görnüşde toplanmagy zähmet ýyllaryndan ýadygärlik, çagalar üçin hem bilim basgançaklaryndan ýatlama, ata-eneler üçin hem bakja-bagynyň okuw işleri bilen tanyşmaklaryna gollanma bolup biler. Ýurdumyzda bilim-terbiýeçilik işlerini milli, syýasy we häzirki zaman pedagogik usullary arkaly kämilleşdirmekde ähli mümkinçilikleri we şertleri döredip berýän türkmen halkynyň Milli Lideri Gahryman Arkadagymyza hem-de Arkadagly Gahryman Serdarymyza egsilmez alkyşlar aýdýarys!
Tawus ANNAMÄMMEDOWA,
Mary welaýat baş bilim müdirliginiň baş hünärmeni.
