Şu gün Türkmenistanyň halky we bütin yslam dünýäsi iň ähmiýetli we mukaddes baýramlaryň biri bolan Oraza baýramyny uly şatlyk we ruhubelentlik bilen garşylaýar. Bir aýlap dowam eden, kalplary tämizlige, sahawatlylyga we agzybirlige çagyrýan merhemetli Remezan aýy özüniň nurana baýramyna — Oraza baýramyna ulaşdy.
Oraza baýramy — bu diňe bir dabaraly saçaklaryň ýazylyp, baýram edilýän güni däl, eýsem, ynsanperwerligiň, özara hormat-sylagyň we bitewüligiň dabaralanýan günüdir. Bu mukaddes günde her bir maşgalada parahatçylyk, agzybirlik we döwletlilik baradaky iň päkize doga-dilegler edilýär. Halkymyzyň gadymdan gelýän asylly däplerine görä, baýram güni dogan-garyndaşlar, goňşy-golamlar biri-biriniňkä myhmançylyga barýarlar, birek-birege iň gowy arzuwlaryny aýdýarlar.
Mähriban watandaşlar!
«THE ASHGABAT TIMES» internet portalynyň adyndan sizi we siziň maşgala agzalaryňyzy mukaddes Oraza baýramy bilen tüýs ýürekden gutlaýarys! Bir aýlap tutan orazalaryňyz, okan namazlaryňyz we beren agzaçar sadakalaryňyz Gudratly Allatagalanyň dergähinde kabul bolsun! Goý, bu nurana baýram her bir öýe bereket, rysgal we bagt getirsin! Merdana halkymyzyň agzybirligi ebedi, Garaşsyz, hemişelik Bitarap Watanymyzyň asmany bolsa elmydama dury we parahat bolsun!
Oraza baýramyňyz gutly bolsun!
«THE ASHGABAT TIMES».
