Ýurdumyzyň ykdysady kuwwatynyň esasy sütüni bolan ýangyç-energetika toplumy özüniň täze ösüş basgançaklaryna gadam basýar. Biziň bilim alýan ojagymyzyň diňe bir hünär berýän mekdep däl, eýsem, uly ylmyň we innowasiýalaryň merkezidigini buýsanç bilen aýdyp bileris. Häzirki wagtda dünýä energetika bazarynda sanly ulgamyň we innowasion tehnologiýalaryň orny barha artýar. Biz okuw derslerimizde diňe bir nebit çykarmagyň usullaryny öwrenmän, eýsem, känleri sanly usulda modellemegi, ekologiýa taýdan arassa önümçiligi guramagy we dünýäniň iň täze tehnologik çözgütlerini özleşdirýäris.
Türkmenistan özüniň ägirt uly tebigy baýlyklary bilen dünýäniň ünsüni çekýär. «Galkynyş» ýaly dünýä derejeli gaz känleriniň özleşdirilmegi we halkara gaz geçirijileriniň gurulmagy biz ýaly ýaş hünärmenleriň öňünde uly jogapkärçilik goýýar. Biz geljekde bu desgalarda işläp, Watanymyzyň rowaçlygyna goşant goşmalydygymyza oňat düşünýäris. Uniwersitetimizde döredilen döwrebap barlaghanalar we sanly bilim ulgamy bolsa bize şol belent sepgitlere ýetmäge ýol açýar.
Döwrüň talaplaryna laýyklykda, «ýaşyl» energetika we ekologiýa meseleleri hem biziň üns merkezimizde durýar. Nebit-gaz çykarylýan we gaýtadan işlenilýän ýerlerde daşky gurşawy goramak, önümçiligiň zyýanly galyndylaryny azaltmak we «mawy ýangyç» bolan tebigy gazy has netijeli ulanmak boýunça ylmy-tejribe işlerini alyp barýarys. Ýaşlaryň ylma bolan höwesini artdyrmakda uniwersitetimiziň ylmy gurnaklarynyň ähmiýeti örän uludyr. Biz ol ýerde täze ideýalarymyzy orta atýarys, startap taslamalaryny taýýarlaýarys we halkara bäsleşiklerinde ýurdumyzyň adyny dabaralandyrmaga çalyşýarys.
Biz ― ýaş nesillere şeýle giň mümkinçilikleri döredip berýän Gahryman Arkadagymyza we hormatly Prezidentimize tüýs ýürekden minnetdarlyk bildirýäris. Biz geljekde öz hünärimiziň ussatlary bolup, Türkmenistanyň nebit-gaz senagatyny täze belentliklere götermäge taýýardyrys.
Enejan TAGAÝEWA,
Ýagşygeldi Kakaýew adyndaky Halkara nebit we gaz uniwersitetiniň talyby.
