Ýakynda Gahryman Arkadagymyzyň Hytaýyň «China Global Television Network» (CGTN) teleýaýlymyna beren interwýusy häzirki zaman dünýä syýasatynda täzeçil garaýyşlaryň we hoşniýetli goňşuçylyk ýörelgeleriniň dabaralanmasy boldy. Bu söhbetdeşlik diňe bir iki döwletiň arasyndaky ykdysady gatnaşyklaryň beýany bolman, eýsem bütin adamzat bähbitli parahatçylykly ösüşiň täze nusgasyny dünýä jemgyýetçiligine hödürledi.
Milli Liderimiziň çuňňur pähim-paýhasyndan gözbaş alýan bu söhbetdeşlikde Türkmenistanyň halkara giňişligindäki ornuna we geljekki nesilleriň abadançylygy ugrunda alnyp barylýan tutumly işlere aýratyn üns çekildi. Söhbetdeşligiň dowamynda Gahryman Arkadagymyz iki halkyň ruhy dünýäsiniň umumylygyny, taryhy kökleriň we medeni gymmatlyklaryň özara baglanyşygyny ussatlyk bilen beýan etdi. Interwýunyň esasy özeni bolan ykdysady we strategik meseleler diňe bir bähbitleriň däl, eýsem jogapkärçilikli çemeleşmeleriň we dünýä durnuklylygynyň hatyrasyna alnyp barylýan hyzmatdaşlygyň dabaralanmasydyr.
Milli Liderimiz energetika we ulag-logistika ulgamlaryndaky ägirt uly taslamalaryň diňe bir yklymlary däl, eýsem halklaryň kalbyny hem biri-birine ýakynlaşdyrýandygyny belläp geçdi. Bu taslamalar häzirki zaman dünýäsinde täze ykdysady merkezleriň kemala gelmegine, durnukly ösüşiň täze binýadynyň tutulmagyna ýardam edýär. Şol bir wagtyň özünde, interwýuda beýan edilen pähimli pikirler häzirki zaman diplomatiýasynyň diňe bir gepleşikler däl-de, eýsem özara ynanyşmagyň we hormat goýmagyň ýokary nusgasydygyny ýene bir gezek subut etdi.
Jemläp aýdanymyzda, Gahryman Arkadagymyzyň Hytaýyň CGTN teleýaýlymyna beren bu taryhy interwýusy dünýä diplomatiýasynyň täze belentligini — pähim-paýhasyň we parahatçylykly diplomatiýanyň dabaralanmasyny aýdyň görkezdi. Milli Liderimiziň parasatly garaýyşlary diňe bir Türkmenistan bilen Hytaýyň arasyndaky köpasyrlyk dostlugy dabaralandyrman, eýsem bütin adamzat bähbitli parahatçylygyň, özara ynanyşmagyň we durnukly ösüşiň täze nusgasyny kemala getirdi. Bu söhbetdeşlik arkaly dünýä jemgyýetçiligi Türkmenistanyň hemişelik Bitaraplyk ýörelgelerine esaslanýan hoşniýetli goňşuçylyk syýasatynyň we Beýik Ýüpek ýolunyň häzirki zaman dowamatynyň ählumumy abadançylyga hyzmat edýändigine ýene bir gezek şaýat boldy.
Jennet MYRADOWA,
Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 5-nji ýyl talyby.
