Berkarar döwletiň täze eýýamynyň Galkynyşy döwründe sporta we sagdyn durmuş ýörelgesine berilýän üns biz — talyp ýaşlary täze belentliklere ruhlandyrýar. Häzirki wagtda badalga alan Türkmenistanyň Talyplar futzal ligasy hut şeýle joşgunly ruhuň aýdyň subutnamasydyr.
2026-njy ýylyň 19-njy fewralynda badalga alan bu gyzykly ýaryşlar diňe bir sport bäsleşigi däl, eýsem, ýokary okuw mekdepleriniň arasyndaky dostlukly gatnaşyklaryň we agzybirligiň nyşanyna öwrüldi. Ýaryşlar iki topara bölünip geçirilýär: Liga-A toparlarynyň oýunlary her hepdäniň duşenbe we penşenbe günleri guralsa, Liga-B toparlarynyň bäsleşikleri bolsa hepdäniň şenbe günlerinde geçirilýär. 19-njy fewraldan 27-nji iýuna çenli dowam etjek bu çekeleşikli oýunlaryň jemleýji tapgyryna bolsa 25-nji iýunda garaşylýar.
Biz — Seýitnazar Seýdi adyndaky Türkmen döwlet mugallymçylyk institutynyň talyplary hem bu uly sport baýramyndan çetde galmaýarys. Institutymyzyň sport desgalarynda talyp türgenlerimiz yzygiderli türgenleşikleri geçirýärler. Mugallymlarymyzyň we tejribeli tälimçilerimiziň goldawy bilen, biziň toparymyz ýaryşyň her bir tapgyryna uly taýýarlykly gelýär. Institutymyzda diňe bir meýdançada däl, eýsem, janköýerlik etmekde-de uly agzybirlik bar. Talyp ýoldaşlarymyz her bir oýunda öz türgenlerimizi ruhlandyryp, ýeňşe bolan ynamy artdyrýarlar.
Bu ýaryşlar ýaşlaryň arasynda dostlukly gatnaşyklary berkitmek, sagdyn durmuş ýörelgesini wagyz etmek we türkmen sportunyň geljekki ýyldyzlaryny ýüze çykarmak üçin ajaýyp mümkinçilikdir. Biz hem öz gezegimizde, institutymyzyň adyndan çykyş edýän ähli talyplarymyza we beýleki ýokary okuw mekdepleriniň toparlaryna üstünlik arzuw edýäris. Goý, iň güýçlüler ýeňiş gazansyn we sportuň joşguny hemişe bizi täze ýeňişlere sary alyp gitsin!
Batyrmyrat MUHAMMEDOW,
Seýitnazar Seýdi adyndaky TDMI-niň pedagogika fakultetiniň 2-nji ýyl talyby.
