Gahryman Arkadagymyzyň Hytaý Halk Respublikasyna amala aşyran dostluk sapary iki döwletiň arasyndaky köpasyrlyk taryhy bolan dostlukly gatnaşyklary täze, strategik basgançaga çykarýar. Bu sapar diňe bir ikitaraplaýyn hyzmatdaşlygyň däl, eýsem sebitde we dünýäde parahatçylygyň hem-de durnuklylygyň berkidilmegine goşant goşýan möhüm syýasy wakadyr.
Gadymy Beýik Ýüpek ýolunyň ugrunda ýerleşýän bu iki ýurduň arasyndaky häzirki zaman gatnaşyklary “Beýik Ýüpek ýolunyň gaýtadan dikeldilmegi” we Hytaýyň “Bir guşak, bir ýol” başlangyçlarynyň utgaşmagy arkaly has-da rowaçlanýar. Häzirki türkmen-hytaý dialogy gözbaşyny müňýyllyklardan alyp gaýdýar. Taryhy maglumatlara görä, biziň eýýamymyzdan öňki II asyrda Hytaý imperatory U Diniň ilçisi Çžan Sýan Parfiýa gelende uly hormat bilen garşylanypdyr. Hut şonda ilçiniň üsti bilen hytaý imperatoryna ilkinji behişdi bedew sowgat iberilipdir.
Saparyň dowamynda HHR-iň Başlygy Si Szinpine Gadyrly atly ajaýyp ahalteke bedewiniň sowgat berilmegi ähmiýetli waka boldy. Hormatly Prezidentimiz Serdar Berdimuhamedowyň adyndan berlen bu sowgat hakyky dostlugyň aýdyň nyşanyna öwrüldi. HHR-iň Başlygy sowgady hoşallyk bilen kabul edip, 12 ýyl mundan ozal oňa Gahryman atly bedewiň hem sowgat berlendigini ýatlady. Si Szinpin “At — myrat”, “At agynan ýerde toý bolar” ýaly türkmen nakyllaryny mysal getirip, Hytaýda ahalteke bedewlerine uly sarpa goýulýandygyny nygtady.
Ykdysady hyzmatdaşlygyň esasyny düzýän energetika pudagynda Türkmenistan we Hytaý dünýä derejesinde nusgalyk işleri durmuşa geçirýärler. Türkmenistanyň tebigy gazynyň Hytaýa iberilmegi boýunça amala aşyrylýan iri taslamalar iki ýurduň milli bähbitleriniň we özara ynanyşmagynyň aýdyň subutnamasydyr. Mundan başga-da, ulag-logistika, dokma senagaty, ýokary tehnologiýalar we sanly ykdysadyýet ýaly ugurlarda gazanylan ylalaşyklar täze iş orunlarynyň döredilmegine hem-de ykdysady ösüşiň çaltlandyrylmagyna mümkinçilik berýär.
Döwletara gatnaşyklarda ylym-bilim we medeni-ynsanperwer ulgamlaryna hem aýratyn orun berilýär. Hytaýyň öňdebaryjy ýokary okuw mekdeplerinde türkmen ýaşlarynyň bilim almagy, iki ýurduň medeniýet günleriniň yzygiderli geçirilmegi halklarymyzyň bir-birine has-da ýakynlaşmagyny üpjün edýär. Ine, şeýle taryhy pursatlar Türkmenistanyň halkara abraýynyň belende galýandygyny we Gahryman Arkadagymyzyň, hormatly Prezidentimiziň parahatçylyk söýüji diplomatiýasynyň rowaçlyklara beslenýändigini ýene bir gezek subut edýär.
Şöhrat JODYÝEW,
TDP-niň Döwletli etrap komitetiniñ başlygy.
