Gündogar halklarynyň taryhy-medeni däp-dessurlaryny dünýä ýaýýan, täze günüň, täze ýylyň buşlukçysy hasaplanýan Nowruz baýramy ýetip geldi. Ol diňe bir baharyň gelendigini buşlaýan sene bolman, eýsem, tebigatyň janlanýandygyndan hem habar berýär. Nowruz döredijilige, zähmetiň ýokary göterilişine, daşky gurşawyň özgermegine çagyryş bolmak bilen, tebigata sazlaşyk, gözellik we hoşniýetlilik eçilýär.
Nowruz baýramy köpöwüşginliligi, taryhy gözbaşyny irki döwürlerden alyp gaýdýandygy hem-de ruhy däp-dessurlary özünde jemleýändigi bilen tapawutlanýar. Nowruz gelende, ekin meýdanlary al-ýaşyl öwsüp, gyşdan çykan maýsalar atyz-pellere görk berip başlaýar. Daýhanlarymyz topraga gowaça çigidini oklap, täze hasylyň düýbüni tutýarlar. Aýdymda aýdylyşy ýaly, ýer görküni ynsan bezäp, uz eýleýän döwri başlanýar.
Gije bilen gündiziň deňleşip, ýazky meýdan işlerine badalga berilýän döwürde bellenilýän Nowruz baýramy sahawatly topraga nur eçilýän pursatlara gabat gelýär. Bu baýramyň gelmegi bilen, ýurdumyzda oba hojalyk işleriniň depginleri ýokarlanýar. Şeýle hem bu günlerde köpçülikleýin bag nahallarynyň oturdylmagy halkymyzyň ajaýyp baýramçylyk bilen asylly işleri utgaşdyrýandygynyň beýanydyr. Şeýlelikde, ýurdumyzyň sähra giňişliklerinde, dag eteklerinde tokaý zolaklary emele gelýär.
Taryhy çeşmelerde gadymy oguzlarda Nowruz baýramynyň döreýşi we onuň köpçülikleýin bellenilişi barada täsirli maglumatlar getirilýär. Bu baýramyň gelip çykyşy hakynda Gündogaryň meşhur alymy we şahyry Omar Haýýamyň «Nowruznama» eserinde-de giňişleýin beýan edilýär. S.A.Tokarewiň bellemegine görä, gadymy oguzlarda tebigatyň janlanmagy mynasybetli geçirilýän dabaralaryň guramaçylykly bolmagy üçin ýörite geňeş çagyrylyp, ähli meseleler agzybirlikde maslahatlaşylypdyr. Goý, bu ajaýyp baýram ata-babalarymyzyň mirasy bolan ýagşy däp-dessurlarymyzy dünýä ýaýyp, bir-birek bilen mähirli, dostlukly gatnaşyklarymyzy has-da pugtalandyrsyn!
Zewar BOGBEKOWA,
Daşoguz şäheriniň 16-njy çagalar bakja-bagynyň terbiýeçisi.
