Toýlary toýlara ulaşýan eziz Diýarymyzda Milli bahar baýramy — Halkara Nowruz güni giňden bellenilýär. Gözbaşyny asyrlaryň jümmüşinden alyp gaýdyp, durmuşyň baky dowamatyny, hoşniýetliligi, ýokary ahlak taglymlaryny alamatlandyrýan bu ajaýyp baýram Berkarar döwletiň täze eýýamynyň Galkynyşy döwründe täze many-mazmun bilen baýlaşdyrylýar.
Gündogar halklarynyň arasynda giňden bellenilip gelinýän Nowruzyň iňňän gadymy we şöhratly taryhy bar. Arkadagly Gahryman Serdarymyzyň: «Dünýäniň birnäçe halklary bilen birlikde, türkmen halky hem gadymy döwürlerden bäri Nowruz baýramyny giňden belleýär. Gündogar halklarynyň durmuşynda täzelenişiň, ynsanperwerligiň, agzybirligiň we jebisligiň baýramyna öwrülen Nowruz baýramy dünýä ýüzünde giňden meşhurdyr. Nowruz baýramy bilen baglanyşykly ýerine ýetirilýän däp-dessurlar dünýä halklarynyň arasynda parahatçylyga, dost-doganlyga esaslanýan hoşniýetli gatnaşyklaryň binýadyny berkidýär» diýen paýhasly sözleriniň çuňňur many-mazmuny munuň özboluşly tassyknamasy bolup ýaňlanýar.
Gije bilen gündiziň ýazky deňleşýän wagtyna gabat gelýän Milli bahar baýramynda ýerine ýetirilýän däp-dessurlar halkymyzyň hemişe tebigat bilen sazlaşykly ýaşap, abadan durmuşa söýgüsiniň egsilmezdigini aýdyň görkezýär. Nowruzyň däp-dessurlarynyň dünýä halklarynyň dost-doganlyk, hoşniýetli goňşuçylyk, medeni-ynsanperwer gatnaşyklaryny kämilleşdirýändigi dünýäde ykrar edilen hakykatdyr. 2009-njy ýylda Nowruz baýramynyň ÝUNESKO-nyň Adamzadyň maddy däl medeni mirasynyň sanawyna girizilmegi munuň buýsançly subutnamasydyr. 2010-njy ýylyň fewral aýynda bolsa Birleşen Milletler Guramasynyň Baş Assambleýasynyň 64-nji mejlisinde her ýylyň 21-nji martynyň «Halkara Nowruz güni» diýlip yglan edilmegi hem-de bu barada ýörite Kararnamanyň kabul edilmegi munuň üstüni ýetirdi.
Gyşyň togsanynyň dolup, ýazyň bossanynyň gelendigini alamatlandyrýan bu baýramyň yrym-ynançlarynyň, däp-dessurlarynyň nesil terbiýesindäki wajyp ähmiýetini hem nygtamak gerek. Berkarar döwletiň täze eýýamynyň Galkynyşy döwrüne mahsus şatlyk-şowhunda, ýokary ruhubelentlikde giňden toýlanýan bu baýram ýurduň daýanjy bolan ýaş nesliň kalbynda watançylyk, zähmetsöýerlik, ynsanperwerlik ýaly gymmatly ahlak häsiýetlerini kemala getirmäge oňyn täsir edýär.
Näzik ATDAÝEWA,
Seýitnazar Seýdi adyndaky TDMI-niň pedagogika fakultetiniň I ýyl talyby.
