Nesilleriň arasyndaky baglanyşygy diňe terbiýe arkaly kemala getirip, berkidip hem-de ösdürip bolýandygy hemmämize mälim hakykatdyr. Çünki terbiýe arkaly ýaş nesil ýaşuly nesilden iň oňat bilimleri, başarnyklary, endikleri kabul edip alýar, özüçe ýaşaýyş modelini ýasajak bolmaýar-da, ýüzýyllyklaryň dowamynda toplanan ygtybarly tejribäni has baýlaşdyrmaga we kämilleşdirmäge çalyşýar. Munuň özi jemgyýetiň durnuklylygyny, öňegidişligini, nesilleriň ruhy-ahlak kämilligini üpjün edýär.
Milli Liderimiz «Ömrümiň manysynyň dowamaty» atly kitabynda: «Terbiýe iň gymmatly baýlykdyr, bilim we ylym bolsa terbiýäniň sütünidir» diýip belleýär. Munuň, hakykatdan-da, şeýledigine Gahryman Arkadagymyzyň «Döwlet guşy» romanyny ýene bir ýola okap çykanyňda göz ýetirmek bolýar. Bu romanda hormatly Arkadagymyzyň kakasy, döwlet Baştutanymyzyň atasy Mälikguly Berdimuhamedowyň Beýik Watançylyk urşuna gabat gelen çagalygynyň bir döwri, has dogrusy, bir ýarym ýyly beýan edilýär.
Mälim bolşy ýaly, manyly ömrüni halkyna, Watanyna bagyş eden Mälikguly aga Berdimuhamet mugallymyň hünärini dowam edip, 1950-nji ýyldan başlap, öz okan mekdebinde kitaphanaçy bolup işe başlaýar, soňra başlangyç synp mugallymy bolýar. Oňa çenli durmuş mekdebinde taplanan ýigit uruş ýyllarynda — heniz on iki ýaşyndaka «Biz hökman ýeňeris, oňa güman ýok, // Ýöne ýeňiş aňsat ýerden bolmaýar» diýlip başlanýan «Ýeňiş biziňki bolar» atly goşgusyny döredýär. Munuň özi Mälikgulynyň durmuşda ir kämil çykandygyny, şahsyýet hökmünde eýýäm şol wagt kemala gelip başlandygyny görkezýär.
Asylly terbiýe — söz bilen hereketiň deň gelmegi, çyn görelde. Anna aganyň «Akyl sandyklary» Berdimuhamet mugallymyň esasy görelde mekdebi bolan bolsa, Mälikguly aga üçin kakasynyň görüm-göreldesi, öwüt-ündewleri, şol bir wagtda il-günüň ussat mugallyma bolan çäksiz hormaty durmuş ýörelgesi bolýar. Milli Liderimiz «Döwlet guşy» romanyna ýazan girişinde: «Mähriban kyblamyň ömür ýoly — maňa nusgalyk ýol, onuň asylly beýik ahlak sypatlary meniň idealym, meniň durmuş uniwersitetim» diýip nygtasa, hormatly Prezidentimiz «Ýaşlar — Watanyň daýanjy» atly kitabynda: «Okamak, ýazmak, döretmek — maşgalamyza mahsus häsiýetleriň biri. Bular bize berlen terbiýäniň esasyny düzýän aýratynlyklar. «Okamak — bereket, ýazmak — kuwwat, döretmek döwletdir» diýerdiler» diýip bellemek bilen, terbiýäniň ruhy-ahlak, dünýägaraýyş taýdan kämil nesilleri ýetişdirmekdäki ähmiýetine üns çekýärler.
Hurmetaý HASANOWA,
Lebap welaýatynyň Çärjew etrabynyň 29-njy orta mekdebiniň başlangyç synp mugallymy.
