Mekdebe çenli edaralar her bir çaganyň durmuşynda ilkinji jemgyýetçilik mekdebi bolup, olaryň geljekki şahsyýet hökmünde kemala gelmeginde düýpli orun tutýar. Lebap welaýatynyň Türkmenabat şäheriniň 40-njy çagalar bakja-bagynda hem çagalara döwrebap bilim we terbiýe bermek, olaryň zehinini ýüze çykarmak hem-de ruhy taýdan sagdyn nesli ýetişdirmek ugrunda yzygiderli işler alnyp barylýar.
Terbiýeçi diňe bir bilim beriji däl, eýsem çaganyň dünýäsine aralaşyp bilýän, onuň gyzyklanmalaryny duýýan we ugrukdyrýan iň ýakyndaky maslahatçysydyr. Mekdebe çenli ýaşly çagalaryň aňy her bir täze maglumaty kabul etmäge örän çeýe bolup, bu döwürde ekilen edep-terbiýe tohumlary geljekde özüniň oňat miwelerini berýär. Häzirki zaman terbiýeçisiniň öňünde duran iň möhüm wezipeleriň biri — çagalaryň bilesigelijiligini höweslendirmek we olarda özbaşdaklyk endiklerini ösdürmekdir. Bakja-bagyň gündelik durmuşynda ulanylýan didaktiki oýunlar, interaktiw usullar we döredijilikli meşgullanmalar çaganyň diňe bir logiki pikirlenmesini däl, eýsem jemgyýetde özüni alyp barmak medeniýetini hem kämilleşdirýär.
Ertekiler dünýäsi, nakyllar we halk oýunlary arkaly çagalarda watansöýüjilik, ulylara hormat goýmak we zähmetsewerlik ýaly iň gowy häsiýetler kemala getirilýär. Her bir çaganyň aýratyn ukybynyň bardygyny göz öňünde tutup, olara şahsyýet hökmünde çemeleşmek terbiýeçilik işiniň hilini ýokarlandyrýar. Terbiýeçilik işinde maşgala bilen saklanýan ysnyşykly gatnaşyk hem üstünligiň esasy kepilidir. Ene-atalar bilen alnyp barylýan maslahatlaşmalar, çagalaryň ösüşi baradaky pikir alyşmalar terbiýäniň bitewüligini üpjün edýär.
Berkarar döwletiň täze eýýamynyň Galkynyşy döwründe ýaş nesliň sagdyn we bilimli bolup ýetişmegi üçin döwletimiz tarapyndan döredilýän giň mümkinçilikler biz — terbiýeçileri has-da tutanýerli zähmet çekmäge ruhlandyrýar. Biziň çagalar bakja-bagymyzda terbiýelenýän nesiller geljekde ýurdumyzyň ösüşlerine özleriniň mynasyp goşantlaryny goşjak kämil şahsyýetler bolup ýetişjekdiklerine ynamymyz uludyr. Terbiýeçiniň söýgüsi we yhlasy bilen gurşalan her bir gün çaganyň ýadynda bagtyýar pursat bolup galýar we onuň geljekki üstünlikleriniň binýadyna öwrülýär.
Aýzada AÇYLOWA,
Lebap welaýatynyň Türkmenabat şäheriniň 40-njy çagalar bakja-bagynyň terbiýeçisi.
