Türkmenistanyň Belgiýadaky ilçisi Sapar Pälwanow Ýewropa Bileleşiginiň ýanyndaky Gresiýa Respublikasynyň Hemişelik wekili Ioannis Wrailas bilen duşuşyk geçirdi. Duşuşygyň dowamynda türkmen-grek gatnaşyklarynyň häzirki ýagdaýy we geljekki mümkinçilikleri ara alnyp maslahatlaşyldy. Bu barada Türkmenistanyň Belgiýadaky Ilçihanasy duşenbe güni habar berdi.
Taraplar söwda dolanyşygynyň oňyn depginini we syýasy derejede alnyp barylýan yzygiderli özgerişleri belläp, soňky döwürde ikitaraplaýyn dialogyň has durnukly hem-de mazmunly häsiýete eýe bolýandygyny nygtadylar.
Duşuşykda «Ýewropa Bileleşigi – Türkmenistan» formatyndaky hyzmatdaşlyga aýratyn üns berildi. Duşuşyga gatnaşyjylar hyzmatdaşlygyň işjeňleşdirilmeginiň, şertnama-hukuk binýadynyň mundan beýläk-de pugtalandyrylmagynyň, şeýle hem Türkmenistan bilen ÝB-niň arasyndaky gatnaşyklaryň yzygiderli institusionallaşdyrylmagynyň möhümdigini bellediler.
Duşuşygyň ahyrynda hyzmatdaşlygyň ugurlaryny giňeltmäge we hyzmatdaşlygy iki tarapyň bähbitlerine laýyk gelýän has ýokary hilli derejä çykarmaga özara gyzyklanma tassyklanyldy.
«THE ASHGABAT TIMES».
