Ozal habar berlişi ýaly, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Hytaýa dostluk saparynyň çäginde Hytaý Halk Respublikasynyň Başlygy Si Szinpin bilen duşuşyk geçirdi. Duşuşygyň dowamynda Si Szinpin ýakyn wagtda Türkmenistanda Adaty hytaý lukmançylyk merkezini we “Lu Ban ussahanalaryny” açmak boýunça taslamalaryň amala aşyryljakdygyna ynam bildirdi.
Adaty hytaý lukmançylyk merkezi gadymy bejeriş usullary bilen häzirki zaman lukmançylygynyň iň soňky gazananlaryny birleşdirýän bilim we tejribe ojagydyr. Bu merkezlerde iňňe bilen bejermek, dermanlyk ösümlikleri ulanmak we dürli owalamak usullary arkaly keselleriň öňüni almak hem-de bejermek işleri alnyp barylýar. Şeýle merkezleriň döredilmegi türkmen we hytaý hünärmenleriniň özara tejribe alyşmagyna, lukmançylyk ylmynyň kämilleşmegine we ilatyň saglygyny berkitmekde goşmaça netijeli usullaryň hödürlenmegine hyzmat edýär.
Bilim ulgamyndaky hyzmatdaşlygyň dabaraly nyşany bolan “Lu Ban ussahanalary” bolsa öz adyny gadymy Hytaýyň beýik binagäri, inženeri we oýlap tapyjysy Lu Bandan alýar. Biziň eýýamymyzdan öňki bäşinji asyrda ýaşap geçen Lu Ban byçgy, rende we dürli ölçeg gurallaryny oýlap tapyp, dünýä taryhynda “hünärmentleriň atasy” hökmünde tanalýar. Onuň adyny göterýän bu halkara taslama häzirki wagtda ýaşlary inženerçilik, maglumat tehnologiýalary we awtomatlaşdyryş ýaly iň döwrebap ugurlar boýunça ýöriteleşdirilen amaly bilim bilen üpjün edýär.
Netijede, lukmançylyk merkezleriniň we tehniki ussahanalaryň sazlaşykly ösdürilmegi ýurduň sanly ykdysadyýete geçmegine we sagdyn jemgyýetiň kemala gelmegine uly goşant goşýar. Bu taslamalar Hytaýyň gadymy akyl-paýhasy bilen häzirki zaman ösüşlerini birleşdirip, Türkmenistanyň ýokary hünärli kadrlaryny taýýarlamakda we halkara standartlaryna laýyk gelýän tehnologiýalary ornaşdyrmakda möhüm ähmiýete eýedir.
«THE ASHGABAT TIMES».
