Türkmenistanyň Aragatnaşyk agentliginiň başlygy Hajymyrat Hudaýgulyýew milli maglumatlary işläp taýýarlaýyş merkeziniň (Data Center) gurluşygy, emeli aň ulgamynda döwlet strategiýasynyň işlenip düzülmegi hem-de «Türkmenaragatnaşyk» agentliginiň binýadynda ýöriteleşdirilen Emeli aňy ösdürmek merkeziniň dörediljekdigini mälim etdi. Bu baradaky beýannama «Türkmenistanyň geljegine maýa goýumlar» atly halkara forumyň dowamynda beýan edildi.
Giň gerimli sanly transformasiýa 2026–2028-nji ýyllar üçin sanly ykdysadyýeti ösdürmegiň Döwlet maksatnamasynyň çäklerinde amala aşyrylýar. Bu resminama 5G tehnologiýalaryny, bulut hyzmatlaryny (cloud services), uly maglumatlary (big data), zatlaryň internetini (IoT) we fintehi ornaşdyrmagy, şeýle-de elektron hökümeti, telemedisinany we uzakdan bilim bermegi döwrebaplaşdyrmagy öz içine alýar.
Emeli aňy (EA) ulanmak boýunça synag taslamalary eýýäm dört pudakda — bilim, saglygy goraýyş, oba hojalygy we ýol hereketini dolandyrmak ulgamlarynda işe girizildi. Şol bir wagtyň özünde, «akylly» Arkadag şäherinde öňdebaryjy sanly çözgütleri ulanmak arkaly gurluşygyň ikinji tapgyry dowam edýär; IT-merkezleri hem paýtagtymyzda, hem-de Arkadag şäherinde döredilýär.
Agentligiň ýolbaşçysy, şeýle hem elektron söwdany ösdürmek boýunça iri daşary ýurt internet platformalary bilen gepleşikleriň geçirilýändigini habar berdi we daşary ýurtly maýadarlary ýurduň sanly düzümine maýa goýmaga çagyrdy. Ol munuň aragatnaşyk pudagyny döwrebaplaşdyrmak üçin iň netijeli çözgütleriň biridigini belledi.
«THE ASHGABAT TIMES».
