AŞGABAT, Türkmenistan — 2026-njy ýylyň 10-njy ýanwar – 8-nji mart aralygynda Aşgabat şäherinde we ýurduň ähli welaýatlarynda sagdyn durmuş ýörelgesini wagyz etmäge, maşgala gymmatlyklaryny, erkekleriň we aýallaryň deň mümkinçiliklerini hem-de aýal-gyzlara bolan hormatly garaýşy ilerletmäge gönükdirilen çäreler tapgyry geçirildi. Bu başlangyç BMG-niň Ilat gaznasynyň (UNFPA) Türkmenistandaky wekilhanasy tarapyndan Türkmenistanyň Döwlet, hukuk we demokratiýa instituty hem-de Türkmenistanyň Bedenterbiýe we sport baradaky döwlet komiteti bilen bilelikde amala aşyryldy.
Çäreler sport mekdeplerinde hem-de «Ýenme», «Keýik okara», «Maşgala», «Dap-dessur», «Ynamly durmuş» we «Zenanlaryň ykdysady jemgyýeti» ýaly jemgyýetçilik guramalarynyň gatnaşmagynda guraldy. Çärelere erkekler we ýetginjek oglanlar, gyzlar, şeýle hem maýyplygy bolan adamlar işjeň gatnaşdy.
Kampaniýanyň çäklerinde jübütleriň arasyndaky oňyn aragatnaşyk, öý işlerini deň paýlaşmak we dawa-jenjelleri çözmek ukyplaryny ösdürmek boýunça okuw maslahatlary geçirildi. Şeýle hem gatnaşyjylar üçin «Breýn-ring» intellektual oýunlary, ýaş kakalar bilen söhbetdeşlikler, öz-özüňi goramak boýunça sapaklar we sport ýaryşlary gurnaldy.
8-nji martda bellenilýän Halkara zenanlar gününe bagyşlap, Tejen, Balkanabat, Daşoguz we Türkmenabat şäherleriniň sport mekdeplerinde iki günlük okuw maslahatlary geçirildi. Çäreleriň dowamynda maşgalada gender deňligi meseleleri boýunça okuw sessiýalary, psihologlar bilen duşuşyklar, gender rollarynyň çalşylmagy baradaky tematiki söhbetdeşlik we gatnaşyjylaryň arasynda özara goldawy hem-de toparlaýyn agzybirligi berkitmäge gönükdirilen sport oýunlary geçirildi.
Sosial torlardaky maglumat kampaniýasy bu çäreleriň üstüni dolduryp, çagalary terbiýelemäge we maşgala durmuşyna işjeň gatnaşýan döwrebap erkegiň keşbini öňe sürdi. UNFPA-nyň bu başlangyjy gender deňligi babatda alnyp barylýan milli ileri tutulýan ugurlaryň durmuşa geçirilmegine ýardam bermek bilen, jemgyýetiň ähli agzalarynyň abadançylygy üçin oňaýly gurşawyň we şertleriň döredilmegine goşant goşýar.
