Mekdebe çenli çagalar edaralarynyň topar otaglarynda «Terbiýeçiniň usuly burçunyň» hem uly ähmiýeti bardyr. Bu burç bilim işgäriniň sapagy nähili derejede mazmunly guraýandygyndan we toplan tejribesinden habar berýär. Sapaklarda usuly gollanmalaryň, görkezme serişdeleriň we esbaplaryň işjeň peýdalanylmagy geçilýän sapaklaryň hilini ýokaralandyrýar, öwrenilýän temanyň ýatda galyjylygyny berkidýär, çagalarda sapaga bolan gyzyklanmalary döredýär.
Usuly burçda, esasan hem, terbiýeçiniň öz elleri bilen ýasan we çagalyk dünýäsine mahsus esbaplaryň ýerleşdirilmegi maksadalaýyk hasaplanylýar. Mundan başga-da, bu ýerde sowatlylygy ösdürmek, daş-töwerek we tebigat bilen tanyşmak, ýönekeý matematiki düşünjeler we beýleki ugurlar boýunça gollanmalaryň we dürli görnüşdäki serişdeleriň toplumy öz ornuny tapýar.
Terbiýeçiler öz usuly burçuny hemişe baýlaşdyrmagyň, täzelikler we täze işlenilip-düzülen ähmiýetli tasalamalar bilen üstini ýetirmegiň ugrunda bolýarlar. Bu bilim-terbiýeçilik işgäriniň hünär taýdan kämilleşmegine itergi berýär. Biz hem öz usuly burçumyzda hem-de otagymyzyň beýleki bezeg serişdelerinde mähriban körpelerimiziň zehinlerini açmaga, bilimlerini ösdürmäge, aň we fiziki taýdan ösüşini talabalaýyk alyp barmaga, hususan-da, mekdebe taýýarlamaga gönükdirilen esbaplardan, enjamlardan we usuly serişdelerden işjeň peýdalanýarys.
Geçilýän sapaklaryň oýun görnüşinde gyzykly pursatlara beslenmegini gazanyp, ýaş nesillerde okuwa, döredijilge we sungata, zähmete we bedenterbiýä bolan höwesleri döredýäris. Berkarar döwletiň täze eýýamynyň Galkynyşy döwründe bilim-terbiýeçilik edaralalarynyň, şol sanda mekdebe çenli çagalar edaralarynyň hem işini kämilleşdirmäge uly mümkinçilikleri döredip berýän Arkadagly Gahryman Serdarymyza we beýik işleri bilen görelde bolýan Gahryman Arkadagymyza tüýs ýürekden alkyşlarymyzy aýdýarys.
Ýazgül NEPESOWA,
Baýramaly şäheriniň 12-nji çagalar bakja-bagynyň kiçi bag toparynyň terbiýeçisi.
