Ýaponiýanyň «SkyDrive» startapy özüniň «SD-05» kysymly aerotaksisiniň Tokio aýlagynyň üstünden synag uçuşyny üstünlikli amala aşyrdy. Ykjam enjam howada üç ýarym minut bolup, tehnologiýalaryň şäher şertlerinde ulanmaga taýýardygyny tassyklady.
Gopgunly dikuçarlardan tapawutlylykda, «SD-05» enjamy 12 sany elektrik dwigateli we akkumulýatorlar arkaly işleýär. Daşyndan seredeniňde, bu gural üç adam üçin niýetlenen uly kwadrokopteri ýatladýar. Modeliň esasy artykmaçlygy — ykjamlygydyr: enjama uly meýdançalar gerek däl, ol hatda binalaryň dykyz ýerleşen şäher şertlerinde-de gonup bilýär.
Işläp düzüjiler uçýan awtomobilleriň megapolisleri dykylşyklardan halas etjekdigine ynanýarlar. Ýoldaky sarp edilýän wagt 4–5 esse gysgalar: adaty taksiniň bir sagat sarp edýän ýoluny aerotaksi 12–15 minutda geçer. Kompaniýanyň ýolbaşçysy Tomohiro Fukudzawanyň sözlerine görä, geljekde uçuşyň bahasy adaty taksi hyzmatyndan diňe iki esse gymmat bolar. Bu bolsa howa arkaly çalt hereket etmegi köpçülik üçin elýeterli eder we şäherdäki dykylşyk meselesini netijeli çözer.
«THE ASHGABAT TIMES».
