Ýurdumyzyň bilim ulgamynda amala aşyrylýan özgertmeler ýaş nesliň kämil, sagdyn we watansöýüji bolup ýetişmegine gönükdirilendir. Çagalar bakja-baglary bolsa körpeleriň jemgyýetçilik durmuşyna ilkinji ädimlerini ädýän, olaryň zehininiň we ahlak sypatlarynyň kemala gelýän mukaddes ojagydyr. Şonuň üçin hem terbiýeçiniň öňünde duran iň esasy wezipe diňe bir bilim bermek däl, eýsem her bir çaganyň ruhy dünýäsine aralaşmak we olarda milli gymmatlyklarymyza bolan söýgini oýarmakdyr.
Lebap welaýatynyň Çärjew etrabynyň 3-nji çagalar bakja-bagynda biz körpeleriň terbiýesine döwrebap usullar bilen çemeleşýäris. Terbiýeçilik işinde milli edep-ekram bilen häzirki zaman okatmagyň sanly tehnologiýalaryny utgaşdyrmak oňyn netijeleri berýär. Çagalaryň wagtyny peýdaly geçirmekleri üçin dürli oýunlaryň, ertekileriň we aýdym-sazlaryň üsti bilen olaryň dünýägaraýşyny giňeltmäge çalşylýar. Sebäbi ertekiler arkaly körpeleriň hakydasynda ýagşylyk, adalatlylyk we zähmetsöýerlik ýaly häsiýetler baky ornaşýar.
Terbiýeçilik işiniň hilini ýokarlandyrmakda terbiýeçi bilen ene-atanyň arasyndaky gatnaşyk hem möhüm orun tutýar. Biz bagymyzda ene-atalar bilen yzygiderli maslahatlaşyp, her bir çaganyň özboluşly zehinini ýüze çykarmaga aýratyn üns berýäris. Şeýle hem körpeleriň saglygyny berkitmek, olary sporta we arassaçylyga höweslendirmek biziň gündelik iş meýilnamamyzyň esasyny düzýär. Arassa howada geçirilýän bedenterbiýe maşklary we bäsleşikler çagalaryň fiziki taýdan sagdyn ösmegine ýardam edýär.
Berkarar döwletiň täze eýýamynyň Galkynyşy döwründe ýaş nesillere döwrebap bilim-terbiýe bermek üçin ähli şertleri döredip berýän hormatly Prezidentimize we Milli Liderimiz Gahryman Arkadagymyza çäksiz minnetdarlygymyzy bildirýäris. Biz – bilim işgärleri, mundan beýläk-de geljegimiz bolan ýaş nesliň kämil bolup ýetişmegi ugrunda yhlasly zähmet çekeris.
Sähra JUMAÝEWA,
Lebap welaýatynyň Çärjew etrabynyň 3-nji çagalar bakja-bagynyň terbiýeçisi.
